სამართალდამცავებმა მოხეს სადავო შენობის კარი აჭედეს

პოლიტიკა - 17:51, 14 Oct, 2016

1591

დღეს, 14 ოქტომბერს, დაახლოებით 14:00 საათზე ადიგენში, სოფელ მოხეში სამართალდამცავები გამოჩნდნენ. მათ სოფლის ცენტრში მდებარე სადავო შენობაზე, რომელშიც ადგილობრივი მუსლიმები მეოთხე დღეა ლოცულობენ, კარი აჭედეს.

„პარასკევის ლოცვა რომ დავასრულეთ და გამოვედით, მერე მოვიდნენ სამართალდამცავები და კარი აჭედეს. სოფელში სრული სიმშვიდეა“, – ამბობს მოხეში მცხოვრები მუსლიმი თემურ მიქელაძე.

ადგილობრივი მუსლიმების თქმით, ისინი არავისთან დაპირისპირებას და არაფრის გაპროტესტებას არ აპირებენ: „არავის წინააღმდეგ არ წავალთ, ლოცვას შენობასთან ახლოს, სოფლის ცენტრში გავაგრძელებთ“.

რატომ მიიღეს სამართალდამცავებმა გადაწყვეტილება, რომ სადავო შენობის კარი აეჭედათ, უცნობია. შინაგან საქმეთა სამინისტროდან პასუხს „სამხრეთის კარიბჭე“ ამ დრომდე ელოდება.

შენობა, რომლის კარიც აჭედეს, ადიგენის მუნიციპალიტეტის კუთვნილებაა.

„შენობა ჩვენ ბალანსზეა, მაგრამ ამ საკითხზე კომენტარს ვერ გავაკეთებთ“, – აცხადებს ადიგენის მუნიციპალიტეტის გამგეობის საზოგადოებასთან ურთიერთობის სამსახურის წარმომადგენელი მამუკა კალანდაძე.

კომენტარს არც რელიგიის სახელმწიფო სააგენტოში აკეთებენ.

„ამაზე მოგვიანებთ ვისაუბრებ, ახლა არა“, – აცხადებს რელიგიის სახელმწიფო სააგენტოს ხელმძღვანელი და ამავე დროს იმ კომისიის წევრი, რომელიც მოხეში სადავო შენობის საკთხს ორი წელია სწავლობს, ზაზა ვაშაყმაძე.

ახალციხისა და ტაო–კლარჯეთის მიტროპოლიტი თეოდორე ჭუაძე კი ამ წუთებში მოხეში მიმდინარე ამბავზე პრესკონფერენციას მართავს.
შეგახსენებთ, მოხეში, სადავო შენობაში, რომელიც მუსლიმების თქმით მეჩეთია, ადგილობრივმა მუსლიმებმა ლოცვა 4 დღის წინ დაიწყეს.

აქ რელიგიურ ნიადაგზე კონფლიქტი 2014 წლის 22 ოქტომბერს მოხდა. მას შემდეგ სადავო შენობის საკითხის შესასწავლად რეგლიის სახელმწიფო სააგენტოში კომისია შექმნა, თუმცა მას გადაწყვეტილება ამ დრომდე არ გამოუტანია.