ქეთევან ციხელაშვილმა ქართულ-ოსური ურთიერთობებისადმი მიძღვნილ კონფერენციაში მიიღო მონაწილეობა

პოლიტიკა - 18:03, 13 Oct, 2016

1338

შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა ქეთევან ციხელაშვილმა ქართულ-ოსური ურთიერთობებისადმი მიძღვნილ კონფერენციაში მიიღო მონაწილეობა.

მეორე საერთაშორისო სამეცნიერო კონფერენცია „ქართულ-ოსურ ურთიერთობათა განვითარების პერსპექტივები: ნართების ეპოსის კვლევის პრინციპები და მეთოდოლოგია“ ივანე ჯავახიშვილის სახელობის თბილისის სახელმწიფო უნივერსიტეტში გაიხსნა.

სახელმწიფო მინისტრი მიესალმა კონფერენციის მონაწილეებს და კონფლიქტით გახლეჩილი საზოგადოებების დაახლოების გზებსა და აუცილებლობაზე ისაუბრა.

„ჩვენ გვაშორებს კონფლიქტის მწარე გამოცდილება და მავთულხლართები, მაგრამ ჩვენ ბევრი რამ გვაერთიანებს. ჩვენ გვაერთიანებს როგორც მომავალი, ისე ჩვენი წარსული, ტრადიციები და ეპოსი, რომელშიც ჩადებულია ჩვენი საერთო ღირებულებები და კულტურა. ეს ყველაფერი ჩვენი ურთიერთობების აღდგენისა და განვითარების წინაპირობაა და ეს ურთიერთობები ისე უნდა განვავითაროთ, რომ ვეღარავინ შეძლოს ჩვენი დაპირისპირება სხვადასხვა პოლიტიკური მიზნისთვის. ჩვენ გადავდგით ნაბიჯები ოსური კულტურისა და ენის განვითარების ხელშეწყობისთვის, კიდევ უფრო მეტისთვის გვაქვს მზაობა და ამ საქმეში მეცნიერებსა და კონფერენციის მონაწილეების მონაწილეობა მისასალმებელი იქნება. მნიშვნელოვანია ნებისმიერი ასეთი ინიციატივა და წამოწყება, რომელსაც გარკვეული წვლილი მაინც შეაქვს შერიგებისა და სამშვიდობო პროცესში“, - განაცხადა ქეთევან ციხელაშვილმა.

კონფერენციაში თსუ რექტორი გიორგი შარვაშიძე, ქართველი და უცხოელი მეცნიერები, სტუდენტები, სამთავრობო და არასამთავრობო ორგანიზაციების, საერთაშორისო ორგანიზაციების წარმომადგენლები, კონფლიქტოლოგები, ექსპერტები მონაწილეობენ. კონფერენციის ორგანიზატორია ივანე ჯავახიშვილის სახელობის თბილისის სახელმწიფოუნივერსიტეტის ქართულ-ოსურ ურთიერთობათა სამეცნიერო-კვლევითი ცენტრი.