"ენმ-ს მხარდაჭერისათვის სამსახურიდან წასვლას მაიძულებენ“ - დაპირისპირება ლაითურის საჯარო სკოლაში

პოლიტიკა - 15:48, 13 Oct, 2016

4788

ლაითურის საჯარო სკოლის მძღოლი ნოდარ სურმანიძე სკოლის დირექციას, ადგილობრივ გამგებელსა და დეპუტატს სამსახურის იძულებით დატოვებაში ადანაშაულებს. სურმანიძის თქმით, ის ენმ-ს მხარდამჭერია და სკოლიდან სწორედ ამ ნიშნით დევნიან.

სურმანიძის თქმით, მას ბავშვების სკოლაში მიყვანისა და შინ დაბრუნების მომსახურებისათვის ყოველდღიურად 50 ლარს უხდიდნენ, თუმცა საარჩევნო კამპანიის მიწურულს ის სკოლის დირექტორმა დაიბარა, სადაც ლაითურში გამგებლის წარმომადგენელი და ადგილობრივი დეპუტატიც დახვდნე და განუცხადეს, რომ მისი ანაზღაურება 50-დან 30-თ ლარამდე შემცირდებოდა.

"დეპუტატს როცა ვუთხარი 30 ლარი მხოლოდ ხარჯებს არ ეყოფა მეთქი მითხრა მაშინ წადი და სხვას ავიყვანთო, სხვა კი უკვე აყვანილი ჰყავდათ. დანიშნეს მეორე ავტობუსი რომლის მძღოლიც "ქართული ოცნების" მხარდამჭერია“ - გვიყვება სურმანიძე.

"არავითარ შემთხვევაში ადგილი პოლიტიკურ დევნას არა აქვს, როგორ გეკადრებათ, პირიქით ეს მძღოლი ჩვენ გვაშანტაჟებს, გვეუბნება თუ ანაზღაურებას არ მოგვიმატებთ ბავშვებს აღარ მოვიყვანო, ამასწინათ როცა უარი თქვა იძულებულები გავხდით მეორე ავტობუსი აგვეყვანა" - ამბობს ლაითურის საჯარო სკოლის დირექტორი, ლალი გაბეჩავა, თუმცა დირექტორი ვერ ხსნის რატომ მიიღო ეს გადაწყვეტილება სოფლის გამგებელთან და დეპუტატთან ერთად.

სკოლის რამდენიმე პედაგოგი კი მძღოლის საქციელის გამო გაკვირვებას ვერ მალავს:

"ჩვენ 300 ლარი გვაქვს ხელფასი და აგერ მძღოლი 720 ლარს იწუნებს ღმერთო ჩემო" -განაცხადა ერთ-ერთმა მასწავლებელმა. მძღოლი შეეცადა დირექტორისა და იქ მყოფი რამდენიმე პედაგოგისათვის აეხსნა, რომ ამ თანხიდან 70%-ი საწვავსა და სხვა ხარჯებს ხმარდება. მოგვიანებით, ნოდარ სურმანიძესა და პედაგოგებს შორის საუბარი დაპირისპირებაში გადაიზარდა.

"დაიწყო ზეწოლები ყველა იმ ადამინაზე, რომლებიც ჩვენ, "ერთიან ნაციონალურ მოძრაობას" გვეხმარებოდნენ საპარლამენტო არჩევნებში, ცდილობენ ისინი აიძულონ დატოვონ სამსახური. ჩვენ ვცდილობთ ყველა ეს ადამიანი დავიცვათ ზეწოლებისა და მუქარებისაგან, ვსარგებლობ შემთხვევით და მოვუწოდებ ხელისუფლებას ნუ დატოვებენ ამ ხალხს ოჯახებს ლუკმა პურის გარეშე, თორემ ეს მწარედ შემოუბრუნდებათ და ხალხი ამას აღარ მოითმენს,"-განაცხადა ენმ-ს ადგილობნრივმა ლიდერმა, დავით მჟავანაძემ.