პარლამენტის თავმჯდომარე აშშ-ის სენატორის აპარატის ხელმძღვანელობას შეხვდა

პოლიტიკა - 14:51, 13 Oct, 2016

1180

პარლამენტის თავმჯდომარე დავით უსუფაშვილმა აშშ-ის რესპუბლიკელი სენატორის, ლინდსეი გრემის აპარატის ხელმძღავნელობასთან შეხვედრა გამართა. სენატორის აპარატის უფროსმა რიჩარდ პერიმ და მრჩეველმა საკანონმდებლო საკითხებში, მეტრიმ რიკუნასმა პარლამენტის თავმჯდომარეს სენატორის მოკითხვა გადასცეს და კიდევ ერთხელ დააფიქსირეს ის მხარდაჭერა, რომელსაც ლინდსეი გრემი ევროატლანტიკურ და ევროპულ სტრუქტურებში ინტეგრაციის გზაზე საქართველოს მისწრაფებებზე გამოხატავს.

დავით უსუფაშვილმა მადლობა მოახსენა ამერიკელ სტუმრებს საქართველოში სტუმრობის გამო და აღნიშნა, რომ მათი ვიზიტი კიდევ ერთი მკაფიო გზავნილია იმ მხარდაჭერისა, რომელსაც საქართველოს დიდი მეგობარი, რესპუბლიკელი სენატორი ჩვენი ქვეყნის მიმართ გამოთქვამს. შეხვედრაზე მხარეებმა 8 ოქტომბერს გამართული საპარლამენტო არჩევნების მნიშვნელობაზე ისაუბრეს და წინასაარჩევნო გარემო და პოსტსაარჩევნო ვითარება განიხილეს. ამერიკელი სტუმრები პარლამენტში შესულ პოლიტიკური პარტიების და საკანონმდებლო ორგანოს მიღმა დარჩენილ პოლიტიკური სუბიექტების მდგომარეობით დაინტერესდნენ და აღნიშნულთან დაკავშირებით პარლამენტის თავმჯდომარის მოსაზრებები და შეფასებები მოისმინეს.