SOS - „ექიმების“ საგანგებო განცხადება

სოც.მედია - 13:41, 13 Oct, 2016

37351

„არ გახდეთ თაღლითობის მსხვერპლი!“ - ვკითხულობთ გადაცემა „ექიმების“ „ფეისბუქის“ პირად გვერდზე. განცხადებაში იმ დანაშაულზე არის საუბარი, რომელზეც რუსთავი 2-ის იურისტები უკვე მუშაობენ.

ყურადღება!
გაურკვეველი კომპანია, რომელიც ყიდის პროდუქტს - "Varikosette"(ვენების პრობლემებისთვის) სარგებლობს ჩვენი არხით, გადაცემით, ტელეკომპანიის ლოგოთი, წამყვანების რეპუტაციით და თქვენი ნდობით ჩვენდამი.
გაფრთხილებთ, რომ ჩვენ არანაირ რეკომენდაციას არ ვუწევთ ამ პროდუქტს. გთხოვთ, გააზიაროთ ეს ინფორმაცია და გააფრთხილოთ ყველა, რომ არ გახდეთ თაღლითობის მსხვერპლი!
რუსთავი 2-ის სამართლებრივი გუნდი მუშაობს აღნიშნული კომპანიის წინააღმდეგ შესაბამისი სამართლებრივი პროცედურების გასატარებლად.
„ნიუპოსტი“ ამ ფაქტთან დაკავშირებით რუსთავი 2-ის საერთაშორისო პროექტების საზ.სთან ურთიერთობის მენეჯერს სალომე ლილუაშვილს დაუკავშირდა.

სალომე ლილუაშვილი: „როგორც "ექიმების" გვერდზე გამოქვეყნებულ განცხადებაშია აღნიშნული, გაურკვეველი კომპანია სარგებლობს "რუსთავი2"-ის ლოგოთი, გადაცემა "ექიმების" პრესტიჟით და მაყურებლის ნდობით. თითქოს, ჩვენს გადაცემაში მოწვეული იყო ექიმი მარინა აფციაური. ეს ექიმი რეალურად არსებობს, მაგრამ მოცემულ ბმულში დართულია სხვა ქალბატონის ფოტო. დიალოგი კი, რომელიც თითქოს ჩვენი გადაცემის წამყვანს - ნინო ჩოგოვაძესა და ქალბატონ მარინას შორის შედგა, არის მოგონილი. მსგავსი რამ ჩვენი გადაცემის ისტორიაში არ ყოფილა. მითუმეტეს, აღნიშნული პრეპარატის შესახებ რეკომენდაციები ჩვენს ექიმებს არ გაუწევიათ. გამომდინარე იქიდან, რომ ჩვენი გადაცემის შემოქმედებითი ჯგუფისა და ჩვენი გადაცემის წამყვანი ექიმებისთვის მნიშვნელოვანია მაყურებლის ინტერესები, გადავწყვიტეთ, მაყურებელი საქმის კურსში ჩავაყენოთ - არ გაებათ მაქინაციაში!პრეპარატის ვარგისიანობაზე ჩვენ პასუხს არ ვაგებთ. მეტიც, კიდევ ერთხელ აღვნიშნავთ - მსგავსი პრეცედენტი გადაცემის არსებობის ისტორიაში არც გვქონია. რასაკვირველია, ეს არის დანაშაული და რუსთავი2-ის იურისტები მუშაობენ ამ საქმეზე“.