,,საკონსტიტუციო უმრავლესობა საშიშია“ - ოთო კახიძეს წინა ხელისუფლების მაგალითი მოჰყავს

პოლიტიკა - 12:56, 13 Oct, 2016

1880

„ერთიანი ნაციონალური მოძრაობის“ წევრი ოთარ კახიძე აცხადებს, რომ მისასალმებელია ოპოზიციური პარტიების ინიციატივა, რომლებიც საზოგადოებას მოუწოდებენ მეორე ტურში „ქართული ოცნების“ კანდიდატებს არ დაუჭირონ მხარი.

„მივესალმები ამ ინიციატივას, ამის შესახებ განცხადება გააკეთა „რესპუბლიკური პარტიის“ ლიდერმა დავით ბერძენიშვილმაც და რამდენიმე პარტიამ. კარგი იქნება თუ საკონსტიტუციო უმრავლესობა არ ექნება „ქართულ ოცნებას“. ყველაფერს მეორე ტური გვიჩვენებს. მაგრამ მეორე ტურამდე უნდა მივიდეთ მშვიდად“ - აღნიშნა კახიძემ.

როგორც კახიძემ განაცხადა, საკონსტიტუციო უმრავლესობა საშიშია, რადგან ხელისუფლება მიყავს ძალაუფლების მონოპოლიზაციისაკენ და საბოლოო ჯამში ეს ხალხისთვის ცუდად მთავრდება.

„ენმ“-ს წევრი პარტიის შეცდომებზეც საუბრობს და აღნიშნავს, რომ სწორედ ეს გახდა მიზეზი 2012 წელს ამომრჩეველმა, რომ მათ მხარი არ დაუჭირა.

„ერთიანი ნაციონალური მოძრაობის“ მმართველობის პერიოდში ის შეცდომები, რომელიც იქნა დაშვებული და რომელმაც დიდწილად განაპირობა ის, რომ 2012 წელს ქართველმა ამომრჩეველმა ნდობა არ გამოუცხადა „ნაციონალურ მოძრაობას“, განპირობებული იყო სწორედ გაწონასწორებისა და დაბალანსების მექანიზმის არარსებობით. ხელისუფლებას არ ჰყავდა მაკონტროლებელი იმ დონეზე, როგორც უნდა ყოლოდა, სწორედ აქედან გამომდინარე საკონსტიტუციო უმრავლესობა საშიშია რადგან ხელისუფლება მიყავს ძალაუფლების მონოპოლიზაციისაკენ“ - განაცხადა კახიძემ.