“ქართული ოცნების“ ოზურგეთის საარჩევნო შტაბის ხელმძღვანელის ბეგლარ სიორიძის განცხადება

პოლიტიკა - 18:53, 10 Oct, 2016

8034

,,ქართული ოცნება - დემოკრატიული საქართველოს“ ოზურგეტის შტაბის ხელმძღვანელი ბეგლარ სიორიძე განცხადებას ავრცელებს, რომელსაც უცვლელად გთავაზობთ:

,,ჩემო ოზურგეთელებო, უპირველესად, მადლობას გიხდით ნდობისთვის, რომელიც კიდევ ერთხელ გამოგვიცხადეთ!

ვულოცავ ჩვენს კანდიდატს ბატონ არჩილ თალაკვაძეს ღირსეულ გამარჯვებას. სრულიად დარწმუნებული ვარ, ოზურგეთისთვის ის ძალიან ბევრ სასიკეთო საქმეს გააკეთებს.

მინდა მადლობა გადავუხადო ‘’ქართული ოცნების’’ საარჩევნო შტაბის სრულ შემადგენლობას, მთელი საარჩევნო კამპანიის მანძილზე დაუღალავი შრომისთვის.

8 ოქტომბრის არჩევნები ჩვენი ქვეყნის ისტორიაში ყველაზე დემოკრატიული საპარლამენტო არჩევნების სახელით შევა. მიუხედავად იმისა, რომ ოპონენტები გამუდმებით ცდილობდნენ საზოგადოება შეცდომაში შეეყვანათ, ოზურგეთელებმა ჩვენი დაუღალავი შრომა სწორად შეაფასეს და არჩევნებზე ღირსეული მოქალაქეობრივი პოზიცია დააფიქსირეს.ეს ფაქტი ჩვენი შრომის ყველაზე დიდი დაფასება გახლავთ.

ეს გახლდათ არჩევნები, სადაც მოქალაქეებმა გადაწყვეტილება ყოველგვარი ძალდატანების, იძულებისა და მუქარის გარეშე მიიღეს. ეს გახლდათ არჩევნები, რომელმაც ცხადი გახადა, რომ ჩვენს ქვეყანას მაღალი სამოქალაქო პასუხიმგებლობის მქონე, ღირსეული საზოგადოება ჰყავს, რომელმაც არჩევანი ქვეყნის განვითარების სასარგებლოდ კიდევ ერთხელ გააკეთა.

განსაკუთრებით ამაყი ვარ ქალაქ ოზურგეთში მიღებული შედეგებით. პარტიამ ‘’ქართული ოცნება’’ და ჩვენმა კანდიდატმა ყველაზე მაღალი შედეგი სწორედ აქ აჩვენეს და ქალაქი ოზურგეთი მთელ მუნიციპალიტეტში გამარჯვების ქვაკუთხედი გახდა.

დარწმუნებული ბრძანდებოდეთ, ‘’ქართული ოცნება’’, თქვენი დეპუტატი არჩილ თალაკვაძე და მე, თქვენი ქალაქის მერი ჩვენს გუნდთან ერთად, უდიდესი პასუხისმგებლობით გავაგრძელებთ ჩვენი საერთო მომავლის ერთად შენებას.

თითოეულ ოზურგეთელს კიდევ ერთხელ გიხდით მადლობას და გილოცავთ გამარჯვებას, რომელიც ჩვენ ყველას ერთად გვეკუთვნის“ - ნათქვამია სიორიძის განცხადებაში.