კითხვები პატრიოტთა ალიანსის 5%-იანი ბარიერის გარშემო - ,,ბევრად მეტი ხმა გვაქვს, ვიდრე ეს 5%-ია“

პოლიტიკა - 15:05, 10 Oct, 2016

4497

საქართველოს ცენტრალური საარჩევნო კომისიის მონაცემები პატრიოტთა ალიანსის პროცენტულ მაჩვენებელთან დაკავშირებით, მუდმივად იცვლება. ირმა ინაშვილის პარტია პერიოდულად ბარიერის გადალახვის ზღვარზე იყო, ბოლო მონაცემებით, კი ხუთ პროცენტიან ბარიერს ლახავს.

ამ დროისთვის არსებული ინფორმაციით, დასათვლელია მხოლოდ 3 უბანი. საქართველოში არსებული 3 702 უბნიდან შეჯამებულია 3686 უბნის შედეგი.

ცესკოს ინფორმაციით ინაშვილის პარტიას 88 132 ხმა უფიქსირდებოდა, რაც ადმინისტრაციის მონაცემით, 5 პროცენტია, თუმცა ხაზგასასმელია, რომ ოფიციალური მონაცემები აქტივობის შესახებ, საიტზე ამ დრომდე არ ასახულა.

შესაბამისად გაჩნდა კითხვები, პატრიოტთა ალიანსის ხმების რაოდენობის 5 პროცენტამდე გაზრდასთან დაკავშირებით, რადგან, მედიაში გავრცელებული ინფორმაციით, არჩევნებში მონაწილეთა რაოდენობიდან გამომდინარე, ცესკოს მიერ დაფიქსირებული ხმების რაოდენბით პატრიოტთა ალიანსი 5%-იანი ბარიერის ზღვარზეა.

ცესკო-ს მიერ მონაცემების ბოლო განახლებამდე პატრიოტთა ალიანსს 88  032 ხმა ჰქონდა, რაც პროცენტულად 4,993%- ს შეადგენს. უახლესი ინფორმაციით, კი ალიანსს 88 132 ხმა აქვს, რაც 4,998% - ა.

ხაზგასასმელია, რომ ცესკოს საიტზე კი ორივე მონაცემის შემთხვევაში, განახლებამდეც და განახლების შემდეგაც, პატრიოტთა ალიანსს 5% ეწერა.

მონაცემთა ბოლო განახლების დროს არ შეცვლილა დათვლილი უბნების რაოდენობა და ის კვლავ 99,92%-ია.

"ნიუპოსტი" გაჩენილი კითხვების ირგვლივ "პატრიოტთა ალიანსის" ერთ-ერთ ლიდერს გოჩა თევდორაძეს ესაუბრა.

"39-ე ოლქის მეოთხე უბანზე 14 ხმა გვეწერა, 114 ხმის ნაცვლად, ჩვენ მივაღწიეთ, რომ ეს 100 ხმა დაგვემატა და ორიოდე წუთის წინ ცესკომ ეს მონაცემები ატვირთა. ასე რომ ვიღაცეები, რომ დაობდნენ დილით 5 ხმა აკლიაო, ეს 2 წუთის წინ გასწორდა, ამ რაოდენობის ხმები დაგვემატა. ასე რომ 5 პროცენტი კი არა ბევრად მეტი გვაქვს. ეს 100 ხმა ვიღაცას იმის საფუძველს არ უნდა აძლევდეს, რომ მონაცემები 4,99 % - ია. გეტყვით იმასაც რომ ქუთაისის 49 -ე ოლქის 76 - ე უბანზე, სადაც 59 ხმა გვაკლია, თუ საიტზე ოქმს ხედავთ, წერია, რომ ამ უბანზე გვაქვს 85 ხმა, გამოტანილ ციფრებში კი 35 წერია. მსგავსი სიტუაცია არის საქართველოს ალბათ 200 უბანზე"- აღნიშნა გოჩა თევდორაძემ.