შეგვიძლია ვთქვათ, რომ ყოველმა მეორე ამომრჩეველმა მხარი „ქართულ ოცნებას“ დაუჭირა

შეგვიძლია ვთქვათ, რომ ყოველმა მეორე ამომრჩეველმა მხარი „ქართულ ოცნებას“ დაუჭირა - ჩუგოშვილი

პოლიტიკა - 13:13, 09 Oct, 2016

10981

„ქართული ოცნება - დემოკრატიული საქართველოს“ წევრის თამარ ჩუგოშვილის განცხადებით, შეიძლება ითქვას, რომ საქართველოში ყოველმა მეორე ამომრჩეველმა მხარი „ქართულ ოცნებას" დაუჭირა.

მისივე თქმით მეორე ტურების სიმრავლე განპირობებულია ძალიან მაღალი ბარიერით, რომელიც „ქართულმა ოცნებამ“ შემოიტანა.

„გუშინდელ დღეს რაც შეეხება, ძირითადად ჩაიარა მშვიდ, სამართლიან გარემოში, იყო მხოლოდ რამდენიმე ინციდენტი 4-5 საარჩევნო უბანზე. ჩვენი ინფორმაციით, გაბათილებულია მხოლოდ 2 უბნის შედეგები, ასევე გარკვეულ უბნებთან ადგილი ჰქონდა ინციდენტებს და ფიზიკურ დაპირისპირებას. გვინდა განსაკუთრებით გამოვახმაუროთ მარნეულში მომხდარ სრულიად მიუღებელ ფაქტს, სადაც „ერთიანი ნაციონალური მოძრაობის“ მიერ ორგანიზებულმა ადამიანების ჯგუფმა შეტევა მიიტანეს საარჩევნო უბანზე, საფრთხე შეუქმნეს იქ მყოფ ადამიანებს, დაზიანება მიაყენეს პოლიციის წარმომადგენლებს და მათი ქცევა შეიცავდა ძალიან სერიოზულ კრიმინალურ ნიშნებს. ამას ხელმძღვანელობდა ერთიანი „ნაციონალური მოძრაობის“ მაჟორიტარობის კანდიდატი. ეს ინციდენტი ყოვლად მიუღებელი იყო“, - განაცხადა ჩუგოშვილმა.

მისივე შეფასებით, სამართალდამცველები ეფექტურად მოქმედებდნენ.