"შიშის, დაზაფრვის პირობებში ცხოვრება, თუ წინსვლა და განვითარება?" - ენმ მოსახლეობისაგან გონივრულ არჩევანს ელის

პოლიტიკა - 14:37, 07 Oct, 2016

3405

“ერთიანი ნაციონალური მოძრაობის“ ლიდერმა დავით ბაქრაძემ საგანგებო ბრიფინგზე წინასაარჩევნო კამპანია შეაჯამა და აღნიშნა, რომ ხვალ საქართველოს მოსახლეობამ არჩევანი, სიძულვილს, დაზაფრვასა, საქართველოს წინსვლასა და განვითარებას შორის უნდა გააკეთოს.

როგორც ბაქრაძემ განაცხადა, „ენმ“-ს საარჩევნო კამპანია მმართველი გუნდისაგან განსხვავებით აწყობილი და მიმართული იყო პოზიტივზე და იმ გეგმაზე, რომელიც განსახორციელებელია მომავალი ოთხი წლის განმავლობაში.

„ჩვენ გვაქვს კონკრეტული გეგმა როგორ ავამუშავებთ ეკონომიკას, როგორ შევქმნით სამუშაო ადგილებს, როგორ გავაუმჯობესებთ მოსახლეობის პირობებს და ამით ჩვენი კამპანია ძალიან მნიშვნელოვნად და რადიკალურად განსხვავდება ხელისუფლების კამპანიისგან, რომელმაც მთელი ეს თვეები გაატარა მოსახლეობის დაშინებაში, დაზაფრვაში, სისხლის ღვრებზე, გადატრიალებაზე ლაპარაკში.

"ამიტომ ხვალ არჩევნებზე თავად მოსახლეობამ უნდა გადაწყვიტოს რა ურჩევნია, ურჩევნია გააგრძელოს შიშის დაზაფრვის პირობებში ცხოვრება, თუ ურჩევნია საქართველოს წინსვლა და განვითარება.

"მეორე და მთავარი, რაც მინდოდა მეთქვა, ამ კამპანიის დროს ნაციონალურმა მოძრაობამ გააკეთა ის, რაც არ გაუკეთებია არასდროს არც ერთ პოლიტიკურ პარტიას საქართველოში.

"საქართველოში ტარდებოდა კარდაკარები, მაგრამ ჩვენ ვართ პირველი პარტია და ეს არის პირველი არჩევნები, როდესაც ჩვენი ყველა დეპუტატობის კანდიდატი პირადად დადიოდა ოჯახებში და პირადად ნახულობდა ყველა იმ პრობლემას, რომელიც აწუხებს ჩვენს მოსახლეობას.

"ამ წუთის მონაცემებით შემიძლია ზუსტად გითხრათ, რომ ჩვენი კანდიდატები ნამყოფები არიან 307 ათას ოჯახში. ეს არის ყოველი მესამე ქართული ოჯახი, სადაც ნაციონალური მოძრაობის დეპუტატობის კანდიდატები პირადად არიან შესულნი და პირადად აქვთ ნანახი მდგომარეობა და პირადად აქვთ მიცემული დაპირება თუ რას გააკეთებენ მომავალი ოთხი წლის განმავლობაში “- განაცხადა დავით ბაქარაძემ.