საქართველოს პარლამენტის თავმჯდომარემ საპარლამენტო არჩევნებთან დაკავშირებით საქართველოს მოქალაქეებს მიმართა:

„ხვალ 8 ოქტომბერს სახელმწიფო ძალაუფლება ერთი დღით უკან გადაეცემა ქართველ ხალხს, იმისათვის, რომ ხვალ საღამოს ქართველმა ხალხმა სახელმწიფო ძალაუფლება მიანდოს თავის ახალ რჩეულებს. ეს არის სახელმწიფოებრივი ცხოვრების უმნიშვნელოვანესი ფაქტი, რომლის მაღალ დონეზე განხორციელება ჩვენი ეროვნული თავმოყვარეობის საკითხია. ამისათვის უკიდურესად მნიშვნელოვანია, რომ ყველა ძირითადმა მოთამაშემ და სუბიექტმა ამ პროცესის მაღალ დონეზე, კანონის შესაბამისად და ჩვენი მდიდარი ეროვნული ტრადიციების შესაბამისად გაართვას თავი ამ ამოცანას. აუცილებელია ყველა პოლიტიკურმა ლიდერმა და პარტიამ განაცხადოს, რომ ის აღიარებს საარჩევნო ადმინისტრაციის მიერ შეჯამებულ შედეგებს და არ დააყრდნობს თავის მომავალ საქმიანობას, საკუთარი კვლევებით მიღებულ რიცხვებს.“- განაცხადა დავით უსუფაშვილმა.

უსუფაშვილის თქმით, ძალიან მნიშვნელოვანია რომ სახელმწიფო დაწესებულებებმა თავისი მოვალეობები პირუთვნელად შეასრულონ. პარლამენტის თავმჯდომარემ მოსახლეობას არჩევნებში მონაწილეობისკენ და მოქალაქეობრივი ვალის მოხდისკენ მოუწოდა.

დავით უსუფაშვილის თქმით, მაჟორიტარულ ოლქებში მოსალოდნელია მეორე ტურები, ამიტომ პოლიტიკური პარტიები 8 ოქტომბრიდან შემდგომ პერიოდში სპეკულაციებს უნდა მოერიდონ.

„ავირჩიოთ ხალხი, ვინც ქვეყნის გაძღოლას შეძლებს, ვინც მშენებლობას შეძლებს, გავაკეთოთ პოზიტიური არჩევანი, ის ვინც უკეთესს გააკეთებს ქვეყნისთვის და არა ნეგატიური არჩევანი, რაც გულისხმობს იმას, თუ ვინ გააგრძელებს უკეთესად ოპონენტებთან გამკლავებას, ქვეყნის დაყოფას და დაშლას. მე მინდა გისურვოთ წარმატება, თავისუფალი არჩევანი ხვალ, რომლითაც იამაყებთ ზეგ“- განაცხადა დავითუსუფაშვილმა.