"ზეწოლა პედაგოგებზე არის სრული სიცრუე“ - განათლების მინისტრი ხიდაშელს ცრუ ბრალდების გავრცელებაში ადანაშაულებს

პოლიტიკა - 12:04, 07 Oct, 2016

1849

განათლებისა და მეცნიერების მინისტრი ალექსანდრე ჯეჯელავა საარჩევნოდ პედაგოგებზე ზეწოლას კატეგორიულად უარყოფს.

„სამწუხაროა, რომ ჩვენს ოპონენტებს ბრალდებების გარდა საკუთარი პოლიტიკური დღის წესრიგი არ ყოფნით მყარი პოზიციებისთვის. ეს არის სრული სიცრუე“, - განაცხადა ალექსანდრე ჯეჯელავამ.
მისი თქმით, განათლების სისტემა აბსოლუტურად დეპოლიტიზებულია.

"მე შევხვდი 9 000-მდე პედაგოგს და ამის შესახებ პირადად ვუთხარი, რომ ჩვენ ჩვენი სკოლები და მოსწავლეები ყველანაირად უნდა დავიცვათ ამ ხრიკებისაგან. რესურს-ცენტრებთან მქონდა პირდაპირი საუბარი, რომ არც ერთი პარტიის, მათ შორის არც მმართველი პარტიის წარმომადგენლებთან არანაირი აქტივობა სკოლისა და სამუშაო საათების კონტექსტში არ უნდა ყოფილიყო. თუ ასეთი დარღვევები იქნება, ჩვენ ამაზე რეაგირებას აუცილებლად გავაკეთებთ ადმინისტრაციულად. მე უპარტიო ვარ და ეს ჩემთვის ძალიან მნიშვნელოვანია"- თქვა მინისტრმა.
თინათინ ხიდაშელის განცხადებით, მიმდინარეობს პედაგოგების შანტაჟი, რომ მათ არჩევნების დღეს გადაწყვეტილება ხელისუფლების სასარგებლოდ მიიღონ და ამასთანავე იარონ იმ შეხვედრებზე, რომელსაც მთავრობა რეგიონში მართავს. წინააღმდეგ შემთხვევაში მათ სამსახურის დაკარგვა ემუქრებათ.
ამის შესახებ განცხადება ხიდაშელმა წინა კვირას ინგა გრიგოლიას გადაცემაში გააკეთა. ხიდაშელი განათლების მინისტრს მიმართავს და აცხადებს, რომ ნუ იმეორებენ ყოფილი ხელისუფლების პრაქტიკას. ხიდაშელის თქმით, ამგვარი ვითარებაა ზესტაფონში, სადაც ის მაჟორიტარობის კანდიდატია.