GFK-ს ვიცე პრეზიდენტმა და ტელეკომპანია „რუსთავი 2“-ის გენერალურმა დირექტორმა დღეს ერთობლივი პრესკონფერენცია გამართეს, სადაც განმარტეს თუ რა მეთოდოლოგიით ატარებს არხის მიერ დაქირავებული კომპანია ეგზიტპოლებს.

შეხვედრას ესწრებოდნენ დიპლომატები, პრეზიდენტის ადმინისტრაციის წარმომადგენლები, მედია მკვლევარები და ჟურნალისტები, რომლებსაც კვლევის ჩატარების შესახებ ინფორმაცია მიაწოდეს.

აღსანიშნავია, რომ “რუსთავი 2“-ის პირდაპირ ეთერში 8 ოქტომბერს, 20:00 საათზე GFK-ს მიერ ჩატარებული ეგზიტპოლების შედეგები გახდება ცნობილი.

"ჩვენი მთავარი კრიტერიუმი ადგილობრივი პარტნიორის შერჩევისას იყოს მისი გამოცდილება და ის თუ როგორ მკაცრად სრულდება მათი მხრიდან ჩვენი წესები და რეგულაციები, რამდენად აკმაყოფილებენ ისინი ჩვენს სტანდარტებს... ამერიკაში ბევრი სააგენტო და პარტნიორია, სადაც ცოლი დემოკრატია, ქმარი - რესპუბლიკელი, ჩვენ არ ვამოწმებთ მათ ოჯახურ დეტალებს, ჩვენთვის ღირებულია მიუკერძოებლობა, ის თუ როგორ მუშაობს ჩვენი პარტნიორი კომპანია, ჩვენი შერჩეული ჯგუფი სანდოდ მიგვაჩნია,“- განაცხადა ვადიმ ვოლოსიმ.

ნიკა გვარამიას განცხადებით, რუსთავი 2-ის პოზიციაა, რომ საველე სამუშაოების შემრჩევი კომპანიის შერჩევაში არ ჩაერიოს, რადგან, მისივე თქმით, ეს იქნებოდა ტელეკომპანიის მხრიდან ეჭვის აღმძვრელი.

"ჩვენ ვიღებთ შედეგებს იმეილით ერი დღით ადრე გამოქვეყნებამდე, ისიც იმიტომ ერთი დღით ადრე, რომ ამის გრაფიკული შეფუთვა გვჭირდება, რასაც, დაახლოებით, 12 საათის განმავლობაში ვაკეთებთ, შემდეგ ეს უკვე იდება ჩვენს საინფორმაციო საშუალებებსა და საიტზე, დამატებითი განმარტებებით, რასაც კანონმდებლობა მოითხოვს,"- განაცხადა გვარამიამ.