ეს აქტი აწყობს რუსეთს, რომელსაც საქართველოს სტაბილურობა და ევროატლანტიკური არჩევანი არ სურს

ეს აქტი აწყობს რუსეთს, რომელსაც საქართველოს სტაბილურობა და ევროატლანტიკური არჩევანი არ სურს - პეტრიაშვილი

პოლიტიკა - 11:41, 06 Oct, 2016

1661

„თავისუფალი დემოკრატების“ ერთ-ერთი ლიდერი ალექსი პეტრიაშვილი გივი თარგამაძის ავტომანქანის აფეთქებას ტერორისტულ აქტად აფასებს. პეტრიაშვილის თქმით, გივი თარგამაძეზე განხორციელებული თავდასხმა არ შეიძლება აწყობდეს ხელისუფლებას და აბსურდულია ის მოსაზრებაც, რომ ეს შეიძლება იყოს „ნაციონალური მოძრაობის“ სცენარი. ერთადერთი ძალა ვისაც საქართველოში დესტაბილიზაცია აწყობს არის რუსეთი.

„მას შემდეგ რაც ეს ფაქტი მოხდა, ორივე მხრიდან ბრალდებების კასკადი მოდის, როდესაც ასე მძიმე ფაქტი ხდება მე მგონია, რომ პოლიტიკოსებმა უფრო მასშტაბურად და სახელმწიფოებრივად უნდა იაზროვნონ. ჩემი აზრით ეს აქტიც და საქართველოში სიტუაციის დაძაბვაც აწყობს იმ ძალას და იმ ქვეყანას, რომელიც არ არის დაინტერესებული საქართველოში სტაბილურობით და ევროატლანტიკური არჩევანით. ეს ყველაზე მეტად აწყობს რუსეთს. შეიძლება გავიხსენოთ კარასინის განცხადებები, რომელიც საუბრობდა წინასაარჩევნო დესტაბილიზაციის საფრთხეზე, იმაზე თუ როგორ განვითარდებოდა საარჩევნოდ მოვლენები საქართველოში. ტერორისტულ აქტებს სპეციალისტები ახორციელებენ. სამწუხაროდ ქვეყანაში არაა ის რეჟიმი, რომელიც უნდა შექმნილიყო უცხო ქვეყნის სპეცსამსახურებთან მიმართებაში. სპეცსამსახურების წარმომადგენლებიც არ უარყოფენ, რომ საქართველო არის ე.წ უსაფრთხო სამოთხე უცხო ქვეყნის სპეცსამსახურებისთვის. შესაბამისად მათი მხრიდან ამის დაგეგმვა და შესრულება სავსებით შესაძლებელი იყო. მე დარწმუნებული ვარ რომ თუ პოლიტიკური ნება იქნება, ჩვენი სპეცსამსახურები შესაბამისად იმუშავებენ ამ საქმეზე.“- განაცხადა ალექსი პეტრიაშვილმა, მისი თქმით ძალიან მნიშვნელოვანია, რომ ეს დანაშაული ცხელ კვალზე და აუცილებლად არჩევნებამდე დარჩენილ დროში გაიხსნას.