ომბუდსმენი აფეთქების ფაქტის დაუყოვნებლივ გამოძიებას მოითხოვს

პოლიტიკა - 11:30, 05 Oct, 2016

1166

სახალხო დამცველი უჩა ნანუაშვილი დეპუტატ გივი თარგამაძის მანქანის აფეთქებასთან დაკავშირებით განცხადებას ავრცელებს, ნანუაშვილი აფეთქების ფაქტის დაუყოვნებლივ გამოძიებას მოითხოვს.

"2016 წლის 4 ოქტომბერს გავრცელებული ინფორმაციის თანახმად, თბილისში, კოლმეურნეობის მოედანზე, ოპოზიციური პარტიის „ერთიანი ნაციონალური მოძრაობის“ ოფისის წინ, ამავე პარტიის წევრისა და მოქმედი პარლამენტარის, გიორგი (გივი) თარგამაძის მანქანა აფეთქდა. გავრცელებული ინფორმაციით, დაშავებულია რამდენიმე ადამიანი. გივი თარგამაძის მიერ მედიაში გაკეთებული კომენტარის მიხედვით, მის წინააღმდეგ აღნიშნული აფეთქება დისტანციური მართვის პულტის გამოყენებით განხორციელდა. საქართველოს შინაგან საქმეთა სამინისტრომ გამოძიება სისხლის სამართლის კოდექსის მე–19 (დანაშაულის მცდელობა) და 109-ე (განზრახ მკვლელობა დამამძიმებელ გარემოებებში) მუხლებით დაიწყო.

საგანგაშოა, რომ ასეთ ფაქტს ადგილი აქვს არჩევნებამდე 3 დღით ადრე. გამოძიების მხოლოდ დაწყება, რასაკვირველია, არ არის საკმარისი. სამართალდამცავმა ორგანოებმა დაწყებული პროცესი დაუყოვნებლივ უნდა მიიყვანონ ბოლომდე, ხოლო დამნაშავე პირების მიმართ დროულად უნდა იქნეს მიღებული კანონშესაბამისი ზომები“- აღნიშნულია სახლხო დამცველის აპარატის განცხადებაში.