2017 წლის ბიუჯეტთან დაკავშირებით „ერთიანი ნაციონალური მოძრაობის“ წევრი პეტრე ცისკარიშვილი განცხადებას აკეთებს. მისი განმარტებით, მომავალი წლის ბიუჯეტი ხელისუფლებას „ტყუილში ამხელს“:

‘’2017 წლის ბიუჯეტი იმ დაპირებებს აცდენილია, რომელიც ქართულმა ოცნებამ წინასაარჩევნოდ საზოგადოებას გამოუცხადა.

სწრაფი განვითარების ზოგადი კრიტერიუმი არ არსებობს, ქართული ოცნება კი სწრაფ განვითარებაზე მინიმუმ 7 – 8 %-იან ზრდაზე საუბრობს. ეფექტიანი ხელისუფლების შემთხვევაში, შესაძლებელია 10 – 12%-იან ზრდაც, თუმცა ქართული ოცნება შემდეგი 4 წლის განმავლობაში დაახლოებით 4 %-იან ზრდას გვპირდება, რაც ასეთი ხელისუფლების პირობებში შეუძლებელია.

4 პროცენტიანი ზრდა დაახლოებით დღევანდელი პოლონეთის ცხოვრების დონეა, რასაც ჩვენ 35 – 40 წლის შემდეგ დავეწევით. ეს ქართული ოცნების სწრაფი განვითარებაა.

ქართული ოცნება პედაგოგებს პირდება გაზრდილ ანაზღაურებას, ბიუჯეტში კი პრემიებია გათვალისწინებული, ოცნების ხელისუფლება წინა წლებთან შედარებით კიდევ უფრო მეტ ფულს, ათეულობით მილიონ ლარს ჩინოვნიკების ანაზღაურებასა და პრემიებზე ითვალისწინებს.

პედაგოგის ანაზღაურება 800 ლარი რომ გახდეს, განათლების სამინისტროს ბიუჯეტში მინიმუმ დამატებით 225 მილიონი ლარი უნდა იყოს გათვალისწინებული. 2017 წლის ბიუჯეტის პროექტში კი 25 მილიონი ლარია, სადაც არაა აღნიშნული ხელფასის ზრდა.

ქართული ოცნება ასევე პენსიას ვერ გაზრდის, რადგან 95 მილიონი ლარით ზრდა, სექტემბერში 20 ლარით გაზრდილი პენსიის დაფარვასაც კი ვერ უზრუნველყოფს. დღევანდელი პენსიის რაოდენობის შენარჩუნებისთვის კი აუცილებელია, მაგალითად, სოციალურ დახმარებას ბიუჯეტი დააკლონ.

სავარაუდოა, რომ ქართული ოცნება არჩევნების შემდეგ ფულის დაზოგვას ადამიანებისთვის სოციალური სტატუსის შეჩერებით აპირებს.

ოცნების ერთ-ერთი გრანდიოზული ტყუილი ინფრასტრუქტურის მშენებლობაა. ბოლო წლების განმავლობაში ამ კუთხით ბიუჯეტში მილიარდი ლარი იყო, მომავალ წელსაც მილიარდია გათვალისწინებული, თუმცა მილიარდიდან, როგორც წესი, 200 მილიონ ლარს დაახლოებით 20%-ს ვერცერთ წელს ვერ ითვისებენ.

განხორციელებისა და ბიუჯეტის ათვისების შემთხვევაში - გამოგონილი 50 გვირაბი, 800 კილომეტრი გზა და ხიდები ვერ აშენდება, რადგან მინიმალური გათვლებით ამას 8 მილიარდი ლარი სჭირდება, მათ კი მხოლოდ მილიარდი’’- განაცხადა პეტრე ცისკარიშვილმა.