"რამდენიმე დღე რჩება ჩემი და თქვენი ხელახლა შეხვედრამდე ნამდვილ "ლაივში"- მიხეილ სააკაშვილი

პოლიტიკა - 11:22, 04 Oct, 2016

25807

საქართველოს მესამე პრეზიდენტმა და ამჟამად უკრაინის ოდესის ოლქის გუბერნატორმა ფეისბუკ ლაივის დროს სამომავლო გეგმებზე ისაუბრა და განაცხადა, რომ ის ნაციონალური მოძრაობის გამარჯვებაში დარწმუნებულია და არჩევნების შემდეგ ის საქართველოში ჩამოსვლას და საქართველოს პოლიტიკურ ცხოვრებაში აქტიურ ჩართვას აპირებს:

„ჩვენ აუცილებლად მოვიგებთ ამ არჩევნებს, ვერანაირ პროვოკაციას ვერ მოგვიწყობენ. პატარ-პატარა მცდელობები იქნება მაგრამ არ უნდა ავყვეთ, ქართველმა ხალხმა ივანიშვილის მოსატყუებელილ კბილი დიდი ხანია მოიცვალა. ამაში ვარ დარწმუნებული. ვიდეოები ვერ შეცვლის რეალობას. რეალობა არის ის რომ 4 წელია ქვეყანა არის გაჩერებული და ხალხს უნდა უკეთესობა და ცვლილება.

მე ძალიან დიდი იმედი მაქვს საქართველოს პოლიციელების და შეიარაღებული ძალების და მჯერა, რომ ისინი არიან ქვეყნის ნამდვილი პატრიოტები და ივანიშვილის არცერთ უკანონო ბრძანებას არ შეასრულებენ, მათ შორის ამ საარჩევნო ციკლშიც.

აუცილებლად ჩამოვალ და აუცილებლად მივიღებ მონაწილეობას საქართველოს ახალი ხელისუფლების დაკომპლექტებაში და შემდგომ აღმშენებლობაში ნურავის ნუ ექნება ილუზია, რომ მე რაიმე ფორმით ჩამომაშორებს საქართველოს შემდგომ აღმშენებლობას. ვინ სად ვიქნებით ამას გადაწყვეტს ქართველი ხალხი და ნაციონალური მოძრაობის საკმაოდ წარმომადგენლობითი ყრილობა, რომელიც გაიმართება არჩევნების შემდეგ. საქართველოს მთავრობა არა პირადი სიმპათიებით, არამედ ხალხის სიმპათიებით დაკომპლექტდება.

დარწმუნებული ვართ რომ ვიმარჯვებთ, დააკვირდით ივანიშვილის სახეს რა პანიკაშია, ყველანი სუს-ი და პოლიციაში ერთმანეთში ჩურჩულებენ, რომ ნაცები იმარჯვებენო. ძალიან მნიშვნელოვანია, რომ გვესმოდეს, ჩვენ ვიმარჯვებთ დამაჯერებლად. გვექნება საშუალება მთავრობა დავაკომპლექტოთ და წავიყვანოთ ქვეყანა წინ. რამდენიმე დღე რჩება ჩემი და თქვენი ხელახლა შეხვედრამდე , ნამდვილ "ლაივში". რამდენიმე დღე რჩება ქვეყნის სამშვიდობოზე გაყვანამდე, ამიტომ ეს რამდენიმე დღე ზედმეტად ნუ ჩავიხვევთ შიშებს. „- განაცხადა მიხეილ საააკაშვილმა.