ნიკა გვარამია ადასტურებს, რომ "რუსთავი 2"-ში სპეცოპერაციაზე ინფორმაცია აქამდეც არსებობდა

პოლიტიკა - 10:14, 04 Oct, 2016

15308

სამაუწყებლო მომპანია რუსთავი 2-ის გენერალური დირექტორის განცხადებით ტელეკომპანიის შენობაში მოსალოდნელი სპეცოპერაციის შესახებ ინფორმაცია მასთან რამდენჯერმე მივიდა, თუმცა ნიკა გვარამია იმედოვნებს, რომ ძალოვანები მსგავსი აბსურდული ქმედებისგან ამჯერადაც თავს შეიკავებენ.

"ასეთი ინფორმაცია ბევრჯერ მოსულა ჩვენამდე, რომ აპირებდნენ სპეცოპერაციას იმ კრიტიკულ ვითარებებში, მაგრამ ეს ვერც ერთხელ შეძლეს. იმედია, რომ საღი აზრი ახლაც ეყოფათ და თავს შეიკავებენ ამგვარი სისულელისგან," - განაცხადა ნიკა გვარამია.

ქრონიკა პლუსის რედაქტორის ელისო კილაძის ინფორმაციით რუსთავი 2-ის შენობაში დღეს ან ხვალ სპეც ოპერაცია ჩატარდება. ამის მიზეზი არსებული რამდენიმე კადრი იქნება, სადაც ტელევიზიიდან გათავისუფლებული ერთ-ერთი თანამშრომელი რუსთავი 2-ის შენობასთან ნარკოტიკების რეალიზაციას ახდენს.

როგორც ნიკა გვარამია ფეისბუკზე წერს ტელეკომპანია სისტემატურად ახდენს სამუშაო ადგილზე თრობის (ალკოჰოლურის თუ ნარკოტიკულის) ფაქტების გამოვლენას, რის საფუძველზეც ათზე მეტი თანამშრომელი განთავისუფლდა. გასაღების ფაქტების გამოვლენის კომპეტენცია კი ტელეკომპანიის ხელმძღვანელობას არ აქვს.

„ამგვარი ინფორმაცია ჩვენთანაც არაერთხელ მოვიდა. სიტყვიერი გაფრთხილებაც მოგვცა შსს-მ, რომ კომპანიაში ნარკოტიკების მომხმარებლები არიან და ასევე, შესაძლოა, ადგილი ქონდეს რიგი თანამშრომლების მხრიდან ნარკოტიკების გასაღებას კომპანიის მიმდებარე ტერიტორიაზე, რომელიც არ შედის ჩვენს კონტროლქვეშ და სადაც აყენია ათობით ვიდეო კამერა (დამონტაჟდა წელიწადნახევრის წინ). აღნიშნულის საფუძველზე სისტემატურად ვეწევით სამუშაო ადგილზე თრობის (ალკოჰოლურის თუ ნარკოტიკულის) ფაქტების გამოვლენას, რის საფუძველზეც ათზე მეტი თანამშრომელი განთავისუფლდა და ეს რუტინულ პრაქტიკად დაინერგა.

რაც შეეხება გასაღების ფაქტებს, აღნიშნულზე რეაგირების და ამგვარი ფაქტების გამოვლენის კომპეტენციას ჩვენ არ ვფლობთ. ნებისმიერ პირთან დაკავშირებით, რომელზეც კომპეტენტური ორგანოების მხრიდან გვექნება ამგვარი შეტყობინება, დაუყოვნებლივ მიღებულ იქნება ადეკვატური ზომები.”- წერს ნიკა გვარამია ფეისბუკზე.