მოძრაობა ,,დაბრუნების“ თავმჯდომარე მალხაზ პატარაია ტელეკომპანია "იმედის" დაკვეთით ჩატარებული გამოკითხვის შედეგებს სოციალურ ქსელში ეხმაურება, პატარაიას თქმით ,,ოცნების“ და ე.წ. პატრიოტთა ალიანსის უმრავლესობა პუტინის სასურველი შედეგია და საქართველოს სახელმწიფოებრიობის მოშლას და თავისუფლების მოედანზე რუსული ჩექმის და ტანკის შემოყვანას ემსახურება:

"პუტინმა ,,იმედით“ არჩევნების მისთვის სასურველი შედეგი გამოგვიცხადა - ,,ოცნების“ და ე.წ. პატრიოტთა ალიანსის უმრავლესობა და შესაბამისად მათი კოალიციური მმართველობა. ძნელი მისახვედრი არ უნდა იყოს, რას ნიშნავს ეს ჩვენი სამშობლოსათვის: აფხაზეთისა და ცხინვალის მტრისთვის საბოლოო ჩაბარებას, ქვეყნის რუსულ ხახაში ჩაგდებას, სახელმწიფოებრიობის მოშლას, ოკუპანტის ჩექმას და ტანკს თავისუფლების მოედანზე.

ამათ ეს არჩევნები წაგებული აქვთ. რეალურად დასავლური ძალები იმარჯვებენ, რომ არა კიდევ ერთი ძლიერი საშუალება მტრის ხელში - გაყალბება. აქ არც თავს დაზოგავს ოლიგარქი და არც ,,გაზპრომის“ ფულს. კონტინგენტიც უცილობლად ეყოლება. სულწაწყმედილებს, ბრიყვებსა და გულუბრყვილოებს ამქყვეყნად რა გამოლევს. ეჭვიც არ შეგვეპაროს, საკუთარი, თარხან-მოურავის, ბურჯანაძის, თოფაძე-ჩიტიშვილ-წითელაშვილების, ბედუკაძე-კვარაცხელიას და სხვათა მაწანწალები, ადმინისტრაციული რესურსი და სუს-ი ამისათვის უკვე მობილიზებული არიან და მამა-მარჩენალის ნიშანს ელიან.

კრემლოიდთა ამ შემოტევის უკუგდება ადვილი არ არის. თუმცა ჩვენ ეს შეგვიძლია საკუთარი ძალებითა და მეგობრების დახმარებით. ეს ორი პირობა ურთიერთდაკავშირებულია. დასავლეთის პოზიცია არჩევნების ლეგიტიმურობის მიმართ შედეგისათვის განმსაზღვრელი ფაქტორი იქნება. მაგრამ მხოლოდ მასზე მოიმედეობა გამყალბებლებს ვერ შეაჩერებს. ყველაზე დიდი პრევენცია ჩვენი აქტიურობაა.

ამ თვალსაზრისით, ძალიან დიდი მნიშვნელობა ენიჭება 5 ოქტომბრის აქციას. რაც უფრო მძლავრი, მრავალრიცხოვანი და ორგანიზებული იქნება დემონსტრაცია, მით უფრო წაუხდებათ გუნება-განწყობა რუსეთუმე-შულავერელებს, მით უფრო დაფრთხებიან და ვერ გაბედავენ სიყალბეს, მით უფრო მობილიზებული იქნება საერთაშორისო საზოგადოებრივი აზრი არჩევნებისა და ზოგადად თავისუფლებისათვის ჩვენი ბრძოლის მიმართ. ამ შემთხვევაში არსებითი მნიშვნელობა არა აქვს, თუ ვინ არის მისი ორგანიზატორი. ეს იქნება ქართველი ერის მანიფესტი, რომ ის ღირსეულად ებრძვის მტერს, მას ცვლილებები სურს და დღევანდელ ხელისუფლებას მშვიდობიანად გაისტუმრებს.

დღეს გადამწყვეტი სიტყვა ჩვენმა დედაქალაქმა, თბილისმა უნდა თქვას. საბოლოო განაჩენი მან უნდა გამოუტანოს ყველა ჯურის კოლაბორაციონისტსა და კაპიტულანტს. ამის დიდი იმედი გვაქვს.

ამ საქმეში წინა ხაზზე, როგორც ადრე, ჩვენ უნდა ვიყოთ - აფხაზეთი! ვიქნებით კიდევაც!

,,მაშ, მტკიცედ იდექით და ნუღარ შეუდგებით მონობის უღელს“ (გალატ.V,1).

გაისად სოხუმში!"- წერს მალხაზ პატარაია.