„ზუგდიდი იმსახურებს უკეთესს ცხოვრებას და უკეთესს მომავალს“- ირაკლი ჩიქოვანი

პოლიტიკა - 16:48, 03 Oct, 2016

1468

„ირაკლი ალასანია - თავისუფალი დემოკრატების“ ქალაქ ზუგდიდის მაჟორიტარი დეპუტატობის კანდიდატი ირაკლი ჩიქოვანი წინასაარჩევნო კამპანიის ფარგლებში აგრძელებს მოსახლეობასთან შეხვედრებს. დეპუტატობის კანდიდატი დღეს ქალაქის რამდენიმე ზუჩაზე იმყოფებოდა და მოსახლეობას შეხვდა. ირაკლი ჩიქოვანმა შეკრებილებს პარტიის წინასაარჩევნო პროგრამის ძირითადი პუნქტები და ზუგდიდის განვითარების მისეული ხედვა გააცნო. დეპუტატობის კანდიდატის განცხადებით, მას სჯერა, რომ ზუგდიდის მოსახლეობა უკეთესს არჩევანს გააკეთებს და 8 ოქტომბრის არჩევნებზე ირაკლი ჩიქოვანს დაუჭერენ მხარს.

„მთელი საარჩევნო კამპანიის ფარგლებში განსაკუთრებულად ვგრძნობდი ზუგდიდელების მხარდაჭერას, მათ პატივისცემას და სიყვარულს. თამამად შემიძლია ვთქვა, რომ ყველასგან განსხვავებული, აქტიური წინასაარჩევნო კამპანია მქონდა, რომლის ფარგლებში მოსახლეობასთან შეხვედრა მიწევდა როგორც შეკრებებზე, ასევე კარდაკარ სიარულის პრინციპით. შევხვდი და გავესაუბრე ათასობით ჩემს თანაქალაქელს, მე მათ გავაცანი ის მთავარი პრინციპები, რომლის გამო გადავწყვიტე არჩევნებში მონაწილეობის მიღება. მე ამ ქალაქმა მომცა ყველაფერი, ამ ქალაქმა ჩამომაყალიბა როგორც ირაკლი ჩიქოვანი და დროა ზუგდიდის დავუბრუნო ის ვალი, რომელიც მე მმართებს ჩემი ქალაქის მიმართ. შემიძლია დარწმუნებით ვთქვა, რომ მე ვიქნები უკეთესი მაჟორიტარი დეპუტატი საქართველოს პარლამენტში ქალაქ ზუგდიდიდან და ყველაფერს გავაკეთებ იმ დაპირების შესასრულებლად, რომელსაც გავცემ ზუგდიდელების მიმართ - არაფერს არ შევპირდები ზუგდიდელებს ისეთს, რომელსაც ვერ შევასრულებ და რასაც შევპირდები, მის შესასრულებლად ბოლომდე დავიხარჯები, რადგან ზუგდიდი იმსახურებს უკეთესს ცხოვრებას და უკეთესს მომავალს“ - განაცხადა მოსახლეობასთან შეხვედრისას ირაკლი ჩიქოვანმა.