"ხელისუფლების გაათმაგებული ბრძოლა და სიურპრიზები მეტი ზიანის მოსაყენებლად"

"ხელისუფლების გაათმაგებული ბრძოლა და სიურპრიზები მეტი ზიანის მოსაყენებლად" - უდუმაშვილი წინასაარჩევნო ზეწოლაზე

პოლიტიკა - 14:36, 03 Oct, 2016

4051

მას შემდეგ რაც „რუსთავი 2“-ის გენერალურმა დირექტორმა ნიკა გვარამიამ დაადასტურა, რომ თბილისის საქალაქო სასმართლოს მოსამართლე თავად ჩაწერა, ამ საქმეზე კომენტარი გენდირექტორის პირველმა მოადგილემაც გააკეთა.

ზაალ უდუმაშვილი აცხადებს, რომ მამუკა ახვლდიანთან გაკეთებული ჩანაწერი მოისმინეს და როცა მასში საუბარი რუსთავი 2 - ის საქმეზე არ იყო ჩანაწერი გაანადგურეს.

საუბრის ჩანაწერის გავრცელებას რაც შეეხება უდუმაშვილის თქმით, ეს ხელისუფლების სიურპრიზის ნაწილია, რომელიც არჩევნებამდე 5 დღის განმავლობაში შესაძლოა კიდევ ვიხილოთ.

"ეს კომუნიკაცია გასული წელს შედგა, გასული წლის ნოემბერში როცა რუსთავი 2-ის საქმე პიკში იყო და რუსთავი 2-ის წასაღებად გამძაფრებული ბრძოლა მიმდინარეობდა. სწორედ მაშინ შედგა კომუნიკაცია, თბილისის საქალაქო სასამართლოს თავმჯდომარესთან და ერთობლივად მივიღეთ გადაწყვეტილება ჩაგვეწერა ეს შეხვედრა. ამას ორი მიზანი ჰქონდა: დაგვეზღვია საკუთარი თავი და ასევე დაგვეზღვია თბილისის საქალაქო სასამართლოს თავმჯდომარე, იმიტომ რომ კაცმა არ იცის რა მოჰყვებოდა ამ შეხვედრას. ჩავიწერეთ ეს საუბარი, მივიტანეთ მოვისმინეთ იმ შემთხვევაში თუ საუბარი შეეხებოდა რუსთავი 2 -ის საქმეს შესაძლებლობა იქნებოდა ჩანაწერები გაგვესაჯაროებინა და თუმცა ამ მიმართულებით არ იყო საუბარი, იქ ზოგადად სასამართლო სისტემაში არსებულ პრობლემაზეა საუბარი, ამიტომ არ ჩავთვალეთ მასალის გამოქვეყნება მიზანშეწონილად და გავანადგურეთ. თუმცა როგორც ხედავთ მასალა გამოქვეყნებულია იმისდა მიუხედავად ჩვენ რა ქმედებები ჩავიდინეთ"- განაცხადა ზაალ უდუმაშვილმა.

ნიკა გვარამიას მოადგილე საზოგადოებას მიმართავს და არ გამორიცხავს, რომ არჩევნებამდე 5 დღით ადრე შესაძლებელია სხვადასხვა ღონისძიებები ჩატარდეს რუსთავი 2 - ის წინააღმდეგ.

"ამ ხელისუფლების მთავარი სამიზნე, ისევე როგორც ბოლო ერთი წლის განმავლობაში არის რუსთავი 2, ბოლო 5 დღის განმავლობაში კი ეს ბრძოლა იქნება გაათმაგებული ამიტომ შესაძლებელია ბევრი სიურპრიზი ვიხილოთ ხელისუფლების მხრიდან. ჩვენ მყარად ვდგავართ და საზოგადოებასაც მოვუწოდებთ რომ მყარად იყვნენ და გააკეთონ ის არჩევანი რაც სწორად მიაჩნიათ"- თქვა უდუმაშვილმა.