,,ძვირფასო ძმაო, რაც ჩვენ გვაერთიანებს უფრო მეტია, ვიდრე ის რაც გვაშორებს“

,,ძვირფასო ძმაო, რაც ჩვენ გვაერთიანებს უფრო მეტია, ვიდრე ის რაც გვაშორებს“ - რომის პაპი სვეტიცხოველში

პოლიტიკა - 19:53, 01 Oct, 2016

4951

რომის პაპმა ფრანცისკემ, რომელიც ამ წუთებში სვეტიცხოვლის საკათედრო ტაძარში იმყოფება, ქართული ენის სიმდიდრეზე გაამახვილა ყურადღება:
"ქართული ენა მდიდარია ძმობის, მეგობრობის და ადამიანთა შორის სიახლოვის გამომხატველი გამოთქმებით, მათ შორისაა ერთი მეტად კეთილშობილი და გულწრფელი გამოთქმა - ”შენ გენაცვალე”, რომლითაც გამოვხატავთ სურვილს შევენაცვლოთ სხვა ადამიანს, ვიტვირთოთ მისი გასაჭირი, საკუთარი სიცოცხლით შევეხიდოთ მას. ლხინისა და ჭირის გაზიარება, ლოცვით ერთობასა და სულიერ კავშირში, ერთურთის ტვირთის ზიდვა, დაე, ამგვარი ძმური ქრისტიანული დამოკიდებულებით იყოს აღბეჭდილი ჩვენი ერთად სავალი გზა"- აღნიშნა პაპმა ფრანცისკემ.
”ქართულ მიწაზე ჩემი მომლოცველობისთვის მადლობას ვწირავ უფალს, რომ მომეცა შესაძლებლობა ლოცვაში ჩავღრმავებულიყავ ამ წმინდა ტაძარში. აქვე მსურს, უღრმესი მადლობა მოგახსენოთ მასპინძლობისათვის, თქვენი ამაღელვებელი დამოწმებისათვის რწმენისა, ქართველი ხალხის კეთილი გულისათვის, რომელმაც მე აღმაშენა. თქვენო უწმინდესობავ, მაგონდება ფსალმუნის სიტყვები: ”რა კარგი და საამურია ერთად რომ ცხოვრობენ ძმები, როგორც ძვირფასი მირონი თავზეჩამოღვრილი”. უძვირფასესო ძმაო, დაე უფალმა, რომელმაც მოგვმადლა სიხარული შეხვედრისა და ერთურთისათვის წმინდა ამბორის მიგებისა, გვაცხოს სურნელოვანი მირონი თანხმობისა. უხვად მოუვლინოს თავისი ლოცვა-კურთხევა ჩვენს და საყვარელი ქართული ხალხის გზას... ძვირფასო ძმაო, რაც ჩვენ გვაერთიანებს უფრო მეტია, ვიდრე ის რაც გვაშორებს”, - განაცხადა რომის პაპმა.