„ნაციონალური მოძრაობა“ რამდენიმე წევრმა დატოვა

პოლიტიკა - 16:31, 30 Sep, 2016

8814

„ნაციონალური მოძრაობის“ ვაკისა და საბურთალოს ორგანიზაციის რამდენიმე წევრმა პარტია დატოვა.
„მაპატიეთ, მაგრამ ვერ გავხდები თანამონაწილე იმ საქმის, სადაც ერთგულ აქტივისტებს შრომას არ უფასებენ და მხოლოდ იყენებენ მათ, ეს მაშინ, როდესაც მძიმე პირობებში უწევთ მუშაობა და ამომრჩეველთან შეხვედრისას უამრავ ლანძღვა-გინებას იტანენ.
ბევრი ემორჩილება თავის ბედს და თვითონ ტოვებს პარტიას. თქვენ, ბატონებო და უპირველესად ბატონო გიგა ბოკერია უღალატეთ პარტიულ ღირებულებებს და პრინციპებს. დღემდე გყავთ პარტიაში ვირთხები და არაფერს აკეთებთ მათ მოსაშორებლად, ხოლო თუ ვინმემ კრიტიკული რამ გითხრათ მას მოღალატედ რაცხავთ, ჰოდა მინდა გითხრათ, ეს თქვენ მიღალატეთ, მე რომელიც ამ წლების განმავლობაში ვიბრძოდი თქვენს გვერდით უანგაროდ.
თუმცა იმათ, ვისაც ჩემზე ნაკლები ღვაწლი ჰქონდა, კარგი სამსახურები დაურიგეთ და ბოლოს გაგიდგნენ, გიღალატეს. იმიტომ ვიდექი "ნაციონალური მოძრაობის" გვერდით, რომ მჯეროდა, ჭეშმარიტ ქართულ სახელმწიფოს აშენებდით და მომავლის ბედ-იღბალი გაწუხებდა. ისევ იგივე შეცდომებს უშვებთ ბატონებო და არ გესმით პატრიოტების ხმა, მტერს ეძებეთ იქ, სადაც ისინი არ არიან.
ამიტომაც გადავწყვიტე საჯაროდ გამოსვლა, რომ მოგაწვდინოთ ხმა, იმედია აწი მაინც დაფიქრდებით, ხოლო მე და ჩემი თანამოაზრეები ვტოვებთ "ნაცმოძრაობას", რითაც ასევე, ვემიჯნებით იმ ძალადობრივ სცენარს, რომელიც "ნაციონალური მოძრაობის" უპასუხისმგებლო ლიდერების გამო შეიძლება განვითარდეს ქვეყანაში", – ნათქვამია საბურთალოს რაიონის კოორდინატორის ნინო კვარაცხელიას განცხადებაში.