,,თუ ეს ობიექტები გრიფით საიდუმლო იყო, დოკუმენტაცია თავდაცვის უწყებაში უნდა ინახებოდეს“

,,თუ ეს ობიექტები გრიფით საიდუმლო იყო, დოკუმენტაცია თავდაცვის უწყებაში უნდა ინახებოდეს“ - მანანა კობახიძე იარღის საცავზე

პოლიტიკა - 18:09, 29 Sep, 2016

2573

"ქართული ოცნების" ერთ-ერთი ლიდერი მანანა კობახიძე არ გამორიცხავს, რომ შინაგან საქმეთა სამინისტროს მიერ ქვეყნის სხვადასხვა ტეროტორიაზე აღმოჩენილი დიდი რაოდენობით ცეცხლსასროლი იარაღი და საბრძოლო მასალა "ნაციონალურ მოძრაობას" პოლიტიკური ინტერესებისთვის სჭირდებოდა.

როგორც მმართველი პარტიის წარმომადგენელმა "ნიუპოსტს" განუცხადა, ეს მხოლოდ ვარაუდია, გამოძიება კი შესაბამისმა სამსახურებმა უნდა ჩაატარონ.

"ძალიან საყურადღებო ფაქტია, შინაგან საქმეთა სამინისტრომ და შესაბამისმა უწყებებმა ყველაფერი უნდა გააკეთონ იმისთვის, რომ დადგინდეს ვის მიერ იქნა ეს იარაღი შეძენილი, შემდეგ ვის მიერ იქნა გადამალული და რა მიზნით. მოკლედ ეს არის დანაშაული, რომელსაც გამოძიება, მოტივების დადგენა და შესაბამისად დამნაშავე პირების გამოვლენა სჭირდება. ცოტა რთულია, პირდაპირი განცხადებები გავაკეთო და ეს ყველაფერი დავუკავშირო ნაციონალურ მოძრაობას, მაგრამ ყველაფრის ალბათობა არის. თუ ისინი გეგმავდნენ არეულობას, შესაძლებელია ასეთი ქმედებებიც განეხორციელებინათ. ეს ვარაუდია, რომელსაც გამოძიება სჭირდება"- აღნიშნა "ნიუპოსტთან" საუბრისას მანანა კობახიძემ.

რაც შეეხება ნაციონალური მოძრაობის წევრების განცხადებას, რომ დღეს აღმოჩენილი იარაღი რუსეთის აგრესიისგან თავდაცვის გეგმის ნაწილი იყო, "ქართული ოცნების" ერთ-ერთი ლიდერი ამბობს, რომ თუ ობიექტები გრიფით საიდუმლო სტატუსის მატარებელი იყო, იმ შემთხვევაში ეს დოკუმენტალურად უნდა იყოს დადასტურებული და თავდაცვის სამინისტროში უნდა ინახებოდეს.

"თუ ეს იყო თავდაცვის მიზნებიდან გამომდინარე, ეს ყველაფერი თავდაცვის სამინისტროს განკარგვის ქვეშ უნდა ყოფილიყო. ეს უნდა ყოფილიყო დაცული გრიფით საიდუმლო, მაგრამ ოფიციალური სახელმწიფო სტრუქტურების გამგებლობის და ზედამხედველობის ქვეშ, სხვანაირად ეს ყველაფერი არის უკანონო - მე თქვენთან სუფთა სამართლებრივ შეფასებას ვაკეთებ. ის, რაც სახელმწიფოს თავდაცვისთვის სჭირდება, იარაღის სახით, ამას ძალიან მკაცრი აღრიცხვა და მკაცრი კონტროლი სჭირდება, ამას თავდაცვის სამინისტრო და შესაბამისი ორგანოები აკონტროლებენ. თუ არ არსებობს თავდაცვის სამინისტროში რაიმე სახის დოკუმენტი, მაშინ ეს არის ძალიან მიამიტური განცხადება, მაგრამ ნაციონალები არ არიან მიამიტები. რა თქმა უნდა, არც იმას გამოვრიცხავ, რომ მსგავსი ტიპის სამალავები წინა ხელისუფლებას შეექმნა, რომ საჭირო დროს საჭირო შემთხვევაში გარკვეული მიზნებისთვის გამოეყენებინათ, ის პოლიტიკური ძალა რომ ძალადობაზეა ორიენტირებული და ყველა მეთოდს მიმართავს ხელისუფლებაში დასაბრუნებლად, ამაში ეჭვი აღარავის ეპარება. თუმცა ეს მაინც ვარაუდია, მთავრი სიტყვა გამოძიებამ უნდა თქვას და თუ ამ პარტიასთან კავშირები დადასტურდა, მაშინ ნაციონალური მოძრაობა კრიმინალურ გაერთიანებად გვევლინება"- აღნიშნა მანანა კობახიძემ.

დღეს შინაგან საქმეთა სამინისტროში საგანგებო ბრიფინგი გაიმართა, რომლის ფარგლებშიც ცნობილი გახდა, რომ შსს-მ სახელმწიფო უსაფრთხოების სამსახურთან და მთავარ პროკურატურასთან ერთად, საბრძოლო იარაღის მარაგს მიაკვლია. საქმეზე გამოძიება საქართველოს სისხლის სამართლის კოდექსის 236-ე მუხლის მეორე ნაწილით დაიწყო. როგორც შსს-ს მიერ გავრცელებულ განცხადებაშია ნათქვამი, სამარხები 2009-2011 წლებში არის შექმნილი.