ბურჭულაძე პოლიტიკაში მოდის მხოლოდ ფინანსებისთვის

ბურჭულაძე პოლიტიკაში მოდის მხოლოდ ფინანსებისთვის - პავლე კუბლაშვილი

პოლიტიკა - 10:54, 28 Sep, 2016

2189

„გირჩის“ ერთ-ერთი ლიდერის პავლე კუბლაშვილის განცხადებით, მათმა პარტიამ ბურჭულაძის ბლოკი თავად დატოვა, რადგან ბურჭულაძეს მხოლოდ თავისი ფინანსები აინტერესებს. კუბლაშვილის თქმით, ბურჭულაძე მძიმე მდგომარეობაშია და „გირჩის“ დადანაშაულება, ამ მძიმე მდგომარეობიდან გამოსასვლელად სჭირდება. კუბლაშვილი ასევე უარყოფს, რომ ბურჭულაძესთან საუბარი ბიძინა ივანიშვილთან დაკავშირებით ქონდა:

“არანაირი საუბარი არც დღეს, არც მანამდე ბიძინა ივანიშვილთან დაკავშირებით არ გვქონია. როგორც ჩანს ძალიან მძიმე მდგომარეობაშია და ამიტომ ფიქრობს რა მოიტყუოს იმისთვის, რომ გამოვიდეს ამ მდგომარეობიდან. აქვს ძალიან დიდი ვალდებულებები თავისი თანაპარტიელების მიმართ, რომლებიც რაიონებში აგიტაციას ეწევიან მისი პარტიის სასარგებლოდ და მას აბსოლუტურად არ აინტერესებს ამ ადამიანების ბედი. მას აინტერესებს მხოლოდ საკუთარი ხელფასი, საკუთარი ფინანსები. ის პოლიტიკაში მოდის მხოლოდ ფინანსებისთვის. რაღაცნაირი ჭორაობა არის უფრო, რომელსაც ალბათ არ უნდა ავყვეთ. გამოჩნდება დანარჩენი ვინ სად და როგორ არის,“ - განაცხადა პალიკო კუბლაშვილმა.

შეგახსენებთ აპც "გირჩმა" პაატა ბურჭულაძის ბლოკი "ბურჭულაძე-სახელმწიფო ხალხისათვის" გუშინ დატოვა. პაატა ბურჭულაძის თქმით, "გირჩებს" ბლოკი იმის გამო დაატოვებინა, რომ მათი დაფინანსების წყარო - ბიძინა ივანიშვილი გამოავლინა. საპირისპიროს აცხადებენ "გირჩის" წარმომადგენლები, ზურაბ ჯაფარიძის თქმით ბლოკი მათ თავად დატოვეს, რადგან პაატა ბურჭულაძე საარჩევნო სიასთან დაკავშირებით აშანტაჟებდა და დამატებით თანხებს სთხოვდა.