ნაციონალური მოძრაობის ზუგდიდის მაჟორიტარობის კანდიდატმა სანდრა რულოვსმა ტრადიციას არც ამჯერად უღალატა და ზუგდიდში მიმდინარე აქციაზე შეკრებილ მოსახლეობას მეგრულად მიმართა.

საქართველოს ყოფილმა პირველმა ლედიმ ამომრჩეველს აქტიურობისთვის მადლობა გადაუხადა და აღნიშნა, რომ მათი მხარდამჭერების რაოდენობა დღითიდღე იზრდება.

რულოვსმა მის კონკურენტზეც ისაუბრა და აღნიშნა, რომ "ქართული ოცნების" ზუგდიდის მაჟორიტარობის კანდიდატი დებატებს და მასთან პირისპირ შეხვედრას გაურბის.

"გამგებელი იყო აქ ადრე - ვიღაც თოლორაია, მითხრეს, რომ შენს დანახვაზე გაწითლდებაო, მაგრამ ეს კაცი არც დებატებში, არც ქუჩაში და არც ზუგდიდობაზე არ მოსულა, იმედი მაქვს რომ მოვა"- აღნიშნა სანდრა რულოვსმა.

ენმ-ს კანდიდატმა იხუმრა კიდეც, რომ დღევანდელი დღისთვის სათანადოდ მოემზადა რომ "თოლორაიას გამოგზავნილ ბეტეერ ქალებს სათანადოდ დახვედროდა".

"მითხრეს, ბეეტერ ქალებს გამოგიგზავნის, რომ თმებით გითრიონო, თმებიც კი გავისწორე, მაგრამ პროვოკაციებზე აღარავინ მოდის. ხო ხედავთ რამდენი ხართ, ვინც დაგვციცავთ ჩვენ და დავიცავთ ჩვენს ხმებს, მთელს საქართველოს და სამეგრელოს. ჩვენ ვერავინ მოგვერევა. უკრაინის რევოლუუციის დროს იყო ასეთი ლოზუნგი - ბევრნი ვართ და ვერავინ ვერ მოგვერევა"- აღნიშნა სანდრა რულოვსმა.

მისი თქმით, ის პოლიტიკოსობას მისი მეუღლისგან სწავლობს.

"მე ვსწავლობ მისი ნიჭისგან, მან წინასწარ იცის რა როგორ მოხდება. მან იცის, რომ გამარჯვებას ჩვენთან ერთად იზეიმებს, ოდესიდან სოლოლაკამდე გვირაბის გათხრაც რომ დასჭირდეს"- თქვა სანდრა რულოვსმა.