საქართველოს ყოფილი პრეზიდენტის მიხეილ სააკაშვილის ქვეყანაში შესაძლო ჩამოსვლასთან დაკავშირებით თავდაცვის მინისტრი ლევან იზორია კომენტარს აკეთებს. მინისტრის განცხადებით მიხეილ სააკაშვილს აღარ შერჩა რესურსი და მას ხალხი არ ენდობა.

„მე დღეს თქვენთან ერთად ვამაყობ იმით, რომ ყველა საკითხზე გვაქვს საჯარო განხილვა. მე არც ერთ კითხვას არ გავურბივარ და ჩვენ ეს შევქმენით ერთად. ღია საზოგადოება, თავისუფალი საზოგადოება. ამიტომ, ვფიქრობ საზოგადოებამ მთელი ამ წლების განმავლობაში დაინახა ის პროგრესი, რამაც თქვენც და მეც შესაძლებლობა მოგვცა ასე ღიად გვესაუბრა ყველა მტკივნეულ საკითხზე, საზოგადოების მიმართ. არ მგონია პიროვნებას, რომელიც თქვენ დაასახელეთ ყოველივე ამის შემდეგ ჰქონდეს რესურსი იმისა, რომე საზოგადოებას ის წარსული მოენატროს, სადაც თქვენ შეზღუდულები იყავით, სადაც სიტყვის თავისუფლება შეზღუდული იყო.

დაბრუნების შემთხვევაში თქვენ იცით, რომ სამართლებრივი პროცედურებია დაწყებული და შესაბამისად რეაგირება ისეთივე იქნება, როგორც ამას ითხოვს კანონი,“ - განაცხადა ლევან იზორიამ.