რესპუბლიკური პარტია ნარკოპოლიტიკის გადახედვაზე ,,თეთრი ხმაურის“ შეთავაზებას უერთდება

პოლიტიკა - 14:13, 25 Sep, 2016

1319

რესპუბლიკური პარტია მოძრაობა ,,თეთრი ხმაურის“ მიერ გაკეთებულ შეთავაზებას უერთდება და განცხადებას ავრცელებს, რომელსაც უცვლელად გთავზობთ:

,,საქართველოს რესპუბლიკური პარტია გაეცნო მოძრაობა „თეთრი ხმაურის“ მიერ პოლიტიკური პარტიებისათვის გაკეთებულ შემოთავაზებას ნარკოპოლიტიკის გადახედვის თაობაზე და გამოხატავს მზადყოფნას, ითანამშრომლოს აღნიშნულ საკითხებთან დაკავშირებით. პარტია ადასტურებს, რომ მხარს დაუჭერს შემდეგი ცვლილებების განხორციელებას:

• მსუბუქი ნარკოტიკის მოხმარებისთვის სისხლისსამართლებრივი პასუხისმგებლობის, ხოლო ყველა სახის ნარკოტიკის მოხმარებისთვის თავისუფლების აღკვეთის გაუქმება

• საკუთარი მოხმარების მიზნით მცენარეების კულტივირებასათან დაკავშირებული კანონმდებლობის გადახედვა

• ნარკოტიკების ოდენობის ქვედა ზღვრის გადახედვა, რომლის გადამეტების შემდეგაც მათი შეძენა/შენახვისათვის დგება სისხლისსამართლებრივი პასუხისმგებლობა

• მცირე ოდენობის შეძენა/შენახვისათვის თავისუფლების აღკვეთის გაუქმება

• ნარკოტიკების მოხმარებისთვის და მცირე ოდენობით პირადი მოხმარებისთვის შეძენა/შენახვისთვის ადმინისტრაციული პასუხისმგებლობის ნორმების გადახედვა

• დიდი და განსაკუთრებით დიდი ოდენობით პირადი მოხმარების მიზნით ნარკოტიკების შეძენა/ შენახვისათვის გათვალისწინებული სანქციების გადახედვა

• ნარკოტიკების მცირე, დიდი და განსაკუთრებით დიდი ადეკვატური ოდენობების დადგენა

• ნარკოტიკების გასაღების მკაფიოდ განსაზღვრა

• ნარკოტესტირების მოქმედი რეჟიმის შეცვლა

• კანონმდებლობით გათვალისწინებული უფლებების ჩამორთმევის და შეზღუდვის გადახედვა

• ნარკოტიკების მომხმარებლებისათვის მკურნალობის, რეაბილიტაციის და ზიანის შემცირების პროგრამების ლეგალური ბაზის უზრუნველყოფა და რეგულაციების დახვეწა

• აღნიშნული პროგრამების ფინანსური მდგრადობის უზრუნველყოფა, გეოგრაფიული და ფინანსური ხელმისაწვდომობის პრინციპების გათვალისწინებით