ბიზნესმენები ზრდასრული ადამიანები არიან და თავად გადაწყვეტენ ვის უჭერენ მხარს

ბიზნესმენები ზრდასრული ადამიანები არიან და თავად გადაწყვეტენ ვის უჭერენ მხარს - ონოფრიშვილი ივანიშვილის მოწოდებაზე

პოლიტიკა - 17:19, 24 Sep, 2016

1477

”ირაკლი ალასანია - თავისუფალი დემოკრატების” წევრი, დავით ონოფრიშვილი მიიჩნევს, რომ ეკონომიკურ ფორუმზე ბიძინა ივანიშვილის მიერ ბიზნესმენებისადმი მოწოდება ზედმეტი იყო.
”ბიზნესმენების მიმართ მოწოდება, რომ დაეფიქსირებინათ თავიანი პოზიცია, ნამდვილად არ იყო საჭირო, რადგან ბიზნესმენები ზრდასრული ადამიანები არიან და თავადაც შეუძლიათ შეაფასონ ეს საკითხი და მიიღონ გადაწყვეტილება თუ ვის უჭერენენ მხარს ამ არჩევნებში - განაცხადა დავით ონოფრიშვილმა.

ალასანაიას გუნდის წევრმა ბიზნეს-ფორუმზე განხილული საკითხებიც გაახმაურა.

” მე დავაფიქსირე რა პრობლემები იყო: ფასიანი ქაღალდების ბაზარი არ განვითარდა, საპენსიო რეფორმა არ დაიწყო, ფინანსებზე ხელმისაწვდომობა ძალიან სუსტია. პროგრამა ”აწარმოე საქართველოში”, სტარტ-აპები დაიწყო, მაგრამ ეს ნამდვილად არ არის საკმარისი, მითუმეტეს, მცირე ბიზნესმენებისთვის, მიკრო ბიზნესისთვის, რომ ქვეყნის რეალური განვითარება მოხდეს. რა თქმა უნდა, ეკონომიკური პოტენციალი არის, ჩვენს პროგრამაშიც წერია, სრულიად შესაძლებელია საშუალოდ 7-8%-იანი ზრდა. ბევრი რამეა გასაკეთებელი, მათ შორის პროფესიონალური მთავრობის არსებობა, რეალურად პრობლემის დანახვა და მათი გადაჭრა”- აღნიშნა დავით ონოფრიშვილმა.

ივანიშვილი ბიზნესმენებთან შეხვედრაზე დაინტერესდა მოუწოდებენ თუ ისინი თანამშრომლებს "სწორი ანალიზი გააკეთონ".

"იმ მეთოდით მართულ ეკონომიკას რანაირი შედეგი შეიძლებოდა ქონებოდა დღეს და ჩვენ რაც გვაქვს ეკონომიკური შედეგები ამის მსგავსი ვერ მოხდებოდა, ეს თქვენთვის რთული საანალიზოა? არჩევნებამდე ორი კვირა დარჩა, ახერხებთ თქვენ და აფასებთ თქვენ სიტუაციას ისე, როგორც მე ეს წარმომიდგენია? და შესაბამისად აკეთებთ ამის მსგავს, ვთქვათ როგორ გითხრათ, ქმედებებს რომ საკუთარ თანამშრომლებს საკუთარ მეზობლებს ახლობლებს მაინც აუხსნათ და მოუწოდოთ?"- თქვა ბიძინა ივანიშვილმა.