,,ეს დოკუმენტი ფარატინა ქაღალდად დარჩება!“ - გოცირიძე ,,ქართული ოცნების“ საარჩევნო პროგრამაზე

პოლიტიკა - 13:00, 24 Sep, 2016

1230

სატუმრო ამბასადორში ნაციონალური მოძრაობის სიის პირველი ათეულის წარმომადგენელმა, რომან გოცირიძემ გააკეთა მოხსენება თემაზე: „ქართული ოცნებისა და ნაციონალური მოძრაობის ეკონომიკური პროგრამების შედარებითი ანალიზი“.

რომან გოცირიძის მმართველი პარტიის საარჩევნო პროგრამაზე შემდეგი შეფასება გააკეთა

,,ქართული ოცნების ახალი საარჩევნო პროგრამა არის ეკლექტური, არარეალისტური დოკუმენტი, ფაქტობრივად, ეს არის სამინისტროების მიერ გაწეული მუშაობის ანგარიში და მომავალში გასაკეთებელ საქმეთა ჩამონათვალი, ტრადიციულად გაჯერებული ცრუ დაპირებებით.

პროგრამით, ქვეყნის ფინანსური რესურსები სათანადოდ არაა შეფასებული, რის გამოც იგი დეკლარირებული სურვილების ერთობლიობაა და აბსოლუტურად მოწყვეტილია რეალობას. მასში გათვალიწინებული ღონისძიებები იმდენად ძვირია, რომ არა თუ ოთხი წლის , არამედ ორი ათეული წლის შემოსავლებიც ვერ გასწვდება მის ხორცშესხმას, რომ არაფერი ვთქვათ მათ მიზანშეწონილებაზე.

ქართული ოცნების საარჩევნო პროგრამა ხელისუფლების მიერ გატარებული იმ ძველი კურსის გაგრძელებაა, რომელმაც ქვეყანა კრიზისში შეიყვანა. ამ დოკუმენტიდან ჩანს, რომ მთავრობას არ აქვს მომავლის ხედვა და არ აპირებენ დაშვებული შეცდომების გამოსწორებას.

ეს პროგრამა ისეთივე ფარატინა ქაღალდად დარჩება, როგორც მათი წინამორბედი დოკუმენტები, რადგან იგი რეალობას არის მოწყვეტილი და ვერ გახდება ქვეყნის განვითარების საფუძველი“- განაცხადა გოცირიძემ.

ენმ-ს წევრმა საზოგადოებას შეახსენა, თუ რას პირდება მათ მომდევნო 4 წლის განმავლობაში ქართული ოცნება:

-პენსიების ზრდას.
-გადასახადების შემცირებას. სრულიად იგნორირებულია მცირე ბიზნესი.
-ბიზნესზე სახელმწიფო-ადმინისტრაციული წნეხის შემცირებას.

-ზედმეტ რეგულაციებზე უარის თქმას .
-ბიუროკრატიული და არაეფექტიანი ხარჯების შემცირებას.

-ბიზნესისა და ინვესტიციების დაცულობის რადიკალური სამართლებრივი ნორმებისა და პროცედურების დანერგვას, სახელმწიფოსთან დავისას მოქალაქის უფლებების გაფართოებას.
-მასწავლებელთა ხელფასების სწრაფ ზრდას
-სასამართლოს დამოუკიდებლობის განმტკიცების რეალური მექანიზმების ამოქმედებას.
-პირად ცხოვრებაში ჩაურევლობას.