"შეუძლებელია ერთიდაიგივე ადგილას ორი პარტიის სამშვიდობო აქცია გაიმართოს"- ენმ "ოცნებას" მიმართავს

პოლიტიკა - 12:38, 24 Sep, 2016

2174

"ერთიანი ნაციონალური მოძრაობის” საარჩევნო შტაბის ხელმძღვანელი ნიკა მელია ქართული ოცნებისგან წინასაარჩევნო დასკვნითი აქციის თარიღის გამოცხადებას ითხოვს.

როგორც მან აღნიშნა, მმართველი პარტია 2 ოქტომბერს აქციის ჩატარებას გეგმავს, როცა ანალოგიური მასშტაბური აქცია დედაქალაქში ნაციონალურ მოძრაობას ამ დღეს უკვე დაანონსებული აქვს.

„მოგეხსენებათ, საარჩევნო კამპანია დასკვნით ეტაპზე გადადის და ყველა პარტია განსაკუთრებულ მზადებაშია. “ერთიანი ნაციონალური მოძრაობა” ემზადება გამარჯვებისთვის და სწორედ ამ სულისკვეთებით, 2 ოქტომბერს მასშტაბურ აქციას ვგეგმავთ თბილისის ცენტრში, რომელიც თავისუფლებისა და რესპუბლიკის მოედნებს მოიცავა, ბუნებრივია რუსთაველის გამზირის ჩათვლით.

ჩვენთვის, კულუარულად, ცნობილი გახდა, რომ 2 ოქტომბერს ”ქართული ოცნება” იმავე ადგილას მსგავსი აქციის ჩატარებას გეგმავს, ამ ინფორმაციის წყარო არის, პირველი ის, რომ ყველა ჩვენი რეგიონალური შტაბის ხელმძღვანელი სატრანსპორტო საშუალების დაქირავებას ცდილობს, სადაც მათ ეუბნებიან, რომ ყველა სატრანსპორტო საშუალება ”ქართული ოცნების” მიერ 2 ოქტომბრისთვის დაჯავშნილია, რათა ისინი თბილისში ჩამოვიდნენ.

მეორე წყაროს მიხედვით კი, თითქმის ყველა საჯარო სამსახურში ამ თარიღისთვის გაფრთხილებულები არიან.

”ქართულ ოცნებას” მოვუწოდებ, ერთი დღის ვადაში დაასახელოს თარიღი, როდის აპირებს ჩაატაროს აქცია, რადგან ჩვენ 2 ოქტომბერს ვაპირებთ აქციის ჩატარებას და შეუძლებელია ერთ ქალაქში, ერთიდაიგივე ადგილას გაიმართოს ორი პოლიტიკური პარტიის სამშვიდობო აქცია“, - ნათქვამია ინფორმაციაში.