ვარშავაში საქართველოს ციხეებსა და სხვა დახურული ტიპის დაწესებულებებში ადამიანის უფლებების თემაზე ღონისძიება გაიმართა

პოლიტიკა - 17:48, 23 Sep, 2016

1239

2016 წლის 22 სექტემბერს, ქ. ვარშავაში, ადამიანის უფლებების საკითხზე ეუთოს ყოველწლიური შეხვედრის ფარგლებში, საქართველოს საგარეო საქმეთა სამინისტროს ორგანიზებით და ეუთო-ში აშშ-ს, კანადის, დიდი ბრიტანეთის, ნორვეგიის, შვედეთის და ლიტვის მუდმივი წარმომადგენლობების თანასპონსორობით გაიმართა პარალელური ღონისძიება (side event) საქართველოს ციხეებსა და სხვა დახურული ტიპის დაწესებულებებში ადამიანის უფლებების თემაზე.

საქართველოს პენიტენციარული სისტემაში გატარებული რეფორმირების შესახებ პრეზენტაციები წარმოადგინეს საქართველოს სასჯელაღსრულებისა და პრობაციის, შინაგან საქმეთა სამინისტროს, აგრეთვე, ევროპის საბჭოს საქართველოს ოფისისა და არასამთავრობო ორგანიზაცია - „ციხის საერთაშორისო რეფორმის“ (PRI) წარმომადგენლებმა.

ღონისძიების მონაწილეებს საშუალება მიეცათ დეტალურად გაცნობოდნენ საქართველოს ციხეებსა და სხვა დახურული ტიპის დაწესებულებებში არსებულ გამოწვევებს, ვითარების გაუმჯობესების მიზნით, სახელმწიფოს მიერ გატარებულ რეფორმებსა და მიღწეულ შედეგებს. აგრეთვე, სტუმრებმა მიიღეს ინფორმაცია ამ პროცესებში საერთაშორისო ორგანიზაციებისა და სამოქალაქო სექტორის ჩართულობასთან დაკავშირებით.

შეხვედრაზე ნაჩვენები იყო დამოუკიდებელი რეჟისორის, ალექსანდრე ქორიძის მიერ მე-16 დაწესებულების შესახებ გადაღებული დოკუმენტური ფილმის ნაწყვეტი.