,,ტყუილად გიხარიათ ვარანცოველებს... კაფეებს კი არა ჯოჯოხეთურ კლუბებს გაგიხსნიან“ - უცხოეთიდან დაბრუნებული ხელოვანის პროტესტი

სოც.მედია - 13:23, 23 Sep, 2016

22558

„ისევ ზანზარებს მთელი ძველი თბილისი! ვერ წარმოიდგენთ ისეთი ამბავია“ - წერს უცხოეთიდან საქართველოში დაბრუნებული ხელოვანი პაატა ქურდაძე და უკვე მერამდენე პოსტს აქვეყნებს თბილისურ აუტანელ ხმაურზე.
პაატა ქურდაძე: „ამ ქალაქს მართლა არაფერი არ ეშველება, ტყუილად გიხარიათ ვარანცოველებს ფეხით სასიარულოდ რომ გადააკეთეს თქვენი უბნის ნაწილი,იქ კაფეებს კი არა ასეთივე ჯოჯოხეთურ კლუბებს გახსნიან და ვერ და არ გიშველით თქვენი უბნელი გია ვოლსკი. ყურადღებასაც არ მოაქცევს თქვენს ტანჯვას. ისევ მანქანებს ევლოთ ჯობდა.
საოცრებაა. თითქმის ბოლოსკენ გავიდა წინასაარჩევნო კამპანია, ყოველდღე ათობით გამოთაყვანებულ პოლიტიკოსსა და მათ მხარდამჭერებს ანახებენ 24 საათი ქართული არხები. რას აღარ პირდებიან მოსახლეობას და თბილისელებს... ხმაურთან დაკავშირებით კი იმისთვისაც კი არ იწუხებენ თავს რომ მოიტყუონ მაინც.
კიდევ ერთხელ ვიმეორებ, ეს თემა ჩემთვის საქართველოს სახელმწიფოს კულტურულობის, ცივილურობის, ადამიანის უფლებების დაცულობის ინდიკატორია და ასეთად დარჩება. შესაძლოა თქვენთვის არაფერს ნიშნავს თუ რა არის ჩემთვის ინდიკატორი, მაგრამ ეს არც მიკვირს - როგორც გითხარით თქვენი კულტურა ძვირფასო პოლიტიკოსებო ზუსტად იმხელაა, რამხელაც თქვენი მგრძნობელობა ადამიანების ამ საშინელი ხმაურით წამების მიმართ ანუ ნული და ეს გეხებათ ყველას ზუსტად ერთნაირად - ქართულ ოცნებას, რესპუბლიკელებს, თავისუფალ დემოკრატებს, ნაციონალუერ მოძრაობას, ლეიბორისტებს, ბურჭულაძეს... ანგაჟირებულ არასამთავრობო ორგანიზაციებს, უსუსურ პოლიციას, რომელსაც ყოველ ღამე დასცინიან შარდენის უბნის "გასვეტსკებული" მედუქნეები და ისინიც მორჩლად იტანენ ამ დაცინვას, ქალაქის მერს, რომელსაც აბსოლუტურად ფეხებზე კიდია ეს კოშმარი და ჟურნალისტებს, რომლებსაც აბსოლუტურად არ აღელვებთ ეს პრობლემა.

ჩემთვის ეს ჯოჯოხეთი ჩემი პირველი ქართული არჩევნების საუნდია... მადლობა ამისათვის პარლამენტსა და აღასრულებელ ხელისუფლებას. თქვენი სრული ცინიკური იგნორი სულ უფრო და უფრო მიბიძგებს აზრისკენ , რომ ჩემს პირველ ქართულ არჩევნებს პროტესტის ნიშნად ბოიკოტი გამოვუცხადო. თქვენ ყველაფერს აკეთებთ იმისათვის რომ აქ დროებით ჩამოსულ ადამიანს ეს ქვეყანა სამუდამოდ შეძულდეს, ასეთი ჩამოსულები კი აქ უამრავია - სასტუმროებში“.