22 სექტემბერს სასტუმრო ქორთიარდ მარიოტში „ირაკლი ალასანია - თავისუფალი დემოკრატების“ წინასაარჩევნო პროგრამის პრეზენტაცია გაიმართა. პრეზენტაცია გახსნა პარტიის ლიდერმა ირაკლი ალასანიამ და ისაუბრა პროგრამის ძირითად მიმართულებებსა და პრიორიტეტებზე, ასევე პარტიის მთავარ ამოცანებსა და მიზნებზე.

ირაკლი ალასანიამ აღნიშნა, რომ ”თავისუფალი დემოკრატები” ცალკე გამოყოფენ ეროვნული უსაფრთხოებისა და საგარეო პოლიტიკის მიმართულებით თავიანთ ხედვებს. პარტიის პროგრამის თანახმად, ”თავისუფალი დემოკრატები” მიიჩნევენ, რომ საქართველოს დეოკუპაციის, ტერიტორიული მთლიანობის აღდგენის და ქვეყნის სუვერენიტეტის განმტკიცებისთვის საჭიროა აქტიური მუშაობა პარტნიორებთან და საერთაშორისო ორგანიზაციებთან: ევროკავშირი, ევროსაბჭო, ეუთო, გაერო და სხვ. განსაკუთრებით ოკუპირებული ტერიტორიების არაღიარების პოლიტიკის გაგრძელება, ევროპული და ევროატლანტიკური ინტეგრაცია.

”თავისუფალი დემოკრატები” ვართ ის პოლიტიკური გუნდი, რომელმაც გარდამტეხი წვლილი შეიტანა ქვეყნის საგარეო პოლიტიკურ წინსვლაში, ქვეყნის თავდაცვისუნარიანობის გაზრდაში და ეროვნული უსაფრთხოების სფეროდ საბჭოთა სისტემიდან თანამედროვე საერთაშორისო სტანდარტების შესაბამის სისტემად გარდაქმნაში. ”თავისუფალ დემოკრატებს” მიგვაჩნია, რომ გრძელვადიანი სტაბილურობის მისაღწევად და შესანარჩუნებლად აუცილებელია საერთო ინტერესების გათვალისწინებით რეგიონის ქვეყნებთან ურთიერთპატივისცემის პრინციპზე აგებული პარტნიორული, კეთილმეზობლური ურთიერთობების გაღრმავება და განმტკიცება. საქართველოს ამ თვალსაზრისით განსაკუთრებული მისია აკისრია რეგიონში“, - განაცხადა ირაკლი ალასანიამ.

ირაკლი ალასანიას განცხადებით, ”თავისუფალი დემოკრატების” წევრები, პირველ რიგში, ეყრდნობიან საკუთარ ცოდნასა და პროფესიონალურ გამოცდილებას და იციან, როგორ მიაღწიონ დასახულ მიზანს.

პროგრამის წინასაარჩევნო პრეზენტაციაზე სიტყვით გამოვიდნენ პარტიის ლიდერები: ალექსი პეტრიაშვილი, ვიქტორ დოლიძე, ზურაბ აბაშიძე. საარჩევნო პროგრამის ეკონომიკური ნაწილის ავტორმა დავით ონოფრიშვილმა მოსახლეობის უმძიმესი ყოფისა და მატერიალური მდგომარეობის გაუმჯობესების მისაღწევად მნიშვნელოვან სეგმენტებზე გააკეთა აქცენტი, მისი თქმით, საქართველოს ექნება უკეთესი ეკონომიკა

და „თავისუფალი დემოკრატები“ იღებენ ვალდებულებას, რომ 4 წლის განმავლობაში ბიუჯეტი სულ მცირე 4 მილიარდით გაიზრდება.

„თავისუფალი დემოკრატების“ წინასაარჩევნო პროგრამა ყველა დარგს მოიცავს, თუმცა პრეზენტაციაზე პარტიის ლიდერებმა ძირითადი აქცენტები გაკეთეს ჯანდაცვის სფეროზე, განათლებაზე, ეკონომიკაზე, შრომით უფლებებსა და ადამიანთა სოციალურ ყოფაზე. ხაზი გაესვა ქვეყნის ერთ-ერთ ყველაზე მტკივნეულ საკითხს - ნარკოპოლიტიკას. პარტიაში მიიჩნევენ, რომ ქვეყნის ნარკოპოლიტიკა უნდა ეფუძნებოდეს სამართლიანობის, თანასწორობის, ადამიანის უფლებების და საზოგადოებრივი ჯანდაცვის პრინციპებს, ამისთვის კი საჭიროა ნარკოტიკებთან დაკავშირებული კანონმდებლობის რეფორმირება.

პარტიის ლიდერმა სასამართლო სისტემაში არსებულ დარღვევებსა და ხარვეზებზეც ისაუბრა. „ჩვენი სასამართლო სისტემა ერთხელ და სამუდამოდ უნდა გათავისუფლდეს წნეხისგან ხელისუფლების მხრიდან“ და ამას „თავისუფალი დემოკრატები“ გავაკეთებთ“, - განაცხადა ირაკლი ალასანიამ.