მმკ-მ და რამდენიმე სასულიერო პირმა რომის პაპის ვიზიტი ლოცვითი დგომით გააპროტესტეს

პოლიტიკა - 18:31, 21 Sep, 2016

4266

მართლმადიდებელ მშობელთა კავშირმა და რამდენიმე სასულიერო პირმა , ვატიკანის საელჩოსთან „ლოცვითი დგომის აქციას“ გამართა. ისინი საქართველოში რომის პაპის ჩამოსვლას აპროტესტებდნენ. მმკ-ს განცხადებაში პაპი ფრანცისკე ერეტიკოსად და„მამათმავლობის მფარველად" არის მოხსენიებული.

მართლმადიდებელ მშობელთა კავშირის და მათთან ასოცირებული სასულიერო პირების განცხადებით რომის პაპის საქართველოში მოწვევის გადაწყვეტილება კათოლიკოს-პატრიარქს ზეწოლის შედეგად მიაღებინეს.

აქციაზე ასევე მიტანილი ჰქონდათ სიძულვილის ენის შემცველი ტრანსპარანტები“ვატიკანი სულიერი აგრესორია”, “შორს საქართველოდან ანტიქრისტე” და ა,შ.

რომის პაპი ფრანცისკე საქართველოს 30 სექტემბერს ეწვევა და მისი სტუმრობა სამი დღის განმავლობაში გაგრძელდება. სტუმრობის განმავლობაში პაპს მიიღებს საქართველოს პრეზიდენტი გიორგი მარგველაშვილი, პაპი ფრანცისკე პრეზიდენტთან შეხვედრის შემდეგ ქვეყნის ხელისუფლებას, სამოქალაქო საზოგადოებასა და დიპლომატიურ კორპუსს შეხვდება.

ვიზიტის პირველ დღეს პაპი საქართველოს მართლმადიდებელი ეკლესიის პატრიარქ, ილია მეორესთანაც გამართავს შეხვედრას, რომლის შემდეგაც რელიგიური პირები სპეციალურ სიტყვას წარმოთქვამენ. ვიზიტის მეორე დღეს, 1 ოქტომბერს, 10 საათზე რომის პაპი მ. მესხის სახელობის სტადიონზე წმინდა წირვას აღავლენს. ქადაგებაზე დასწრება მოსაწვევის მქონე ყველა მსურველს შეეძლება. მოსაწვევების მიღება პაპის წირვაზე დასასწრებად კათოლიკურ ეკლესიაშია შესაძლებელი. ვიზიტის ფარგლებში რომის პაპი ფრანცისკე მცხეთის სვეტიცხოვლის ტაძარსაც მოინახულებს, 2 ოქტომბერს კი ბაქოში გაემგზავრება.

ფოტო ლიბერალი