"ინიციატივა ჩემი იყო და არა "ოცნების"... ხელს მაინც მოვაწერ"- დოლიძე ე.წ მშვიდობის მემორანდუმზე

პოლიტიკა - 13:26, 21 Sep, 2016

1643

“თავისუფალი დემოკრატების“ ერთ-ერთი ლიდერი ვიქტორ დოლიძე "ნიუპოსტთან" ამბობს, რომ ,არჩევნების მშვიდ გარემოში ჩატარების უზრუნველსაყოფად პოლიტიკურ პარტიებს შორის შეთანხმების იდეა "თავისუფალ დემოკრატებს“ ეკუთვნით.
მიუხედავად ამისა ალასანიას გუნდის წევრი მზად არის „ქართული ოცნების“ მშვიდობის მემორანდუმს ხელი მოაწეროს.
მისი თქმით, მიესალმება ყველა დოკუმენტს, რაც არჩევნების მშვიდობიან გარემოში ჩატარებას უზრუნველყოფს აუცილებლად მოაწერს ხელს.

„გახსოვთ, ალბათ, რომ ჩემი ინიციატივა იყო რამდენიმე დღის წინ, ე.წ ქცევის კოდექსი, ქცევის წესებთან დაკავშირებით წინასაარჩევნოდ, დოკუმენტი რომელზეც ევროპარლამენტარებთან ერთად ვიმუშავეთ თავის დროზე და წავიღეთ პარლამენტში, ხელი მოაწერა ყველა საპარლამენტო პოლიტიკურმა ძალამ, გარდა „ნაციონალური მოძრაობისა“.

ვფიქრობ ეს არის მრავლისმომცველი საქმიანი და პოზიტიური დოკუმენტი, რომელიც უნდა არსებობდეს. არსებობის პირობებში, რა საჭიროა ახლა, ახალი მემორანდუმის მოგონება მე არ ვიცი, მაგრამ, კიდევ ერთხელ გიდასტურებთ, რომ ნებისმიერ ინიციატივას მივესალმები და ხელს მოვაწერ, თუნდაც ათი დოკუმენტი იყოს, რომელიც წინასაარჩევნო გარემოს გამოადგება, მე მხარს დავუჭერ მიუხედავად იმისა რაც ვთქვი“- აღნიშნა ვიქტორ დოლიძემ „ნიუპოსთან“ საუბრისას.

ვიქტორ დოლიძემ განმარტა, რომ მან ამ საკითხზე ჯერ კიდევ ივნისის თვეში პარლამენტის ბიუროს სხდომაზე ისაუბრა და სწორედ ვიქტორ დოლიძე არის ავტორი “საარჩევნო პერიოდში ეთიკის წესების შესახებ“ პარლამენტის განცხადების პროექტის, რომელიც პარლამეტში მან 20 ივნისს წარადგინა.

პარლამენტის 22 ივნისის პლენარულ სხდომაზე “საარჩევნო პერიოდში ეთიკის კოდექსი” დაამტკიცეს. საკანონმდებლო ინიციატივას მხარი 87-მა პარლამენტარმა დაუჭირა.

“ქცევის კოდექსის” თანახმად, პოლიტიკურმა პარტიებმა უარი უნდა თქვან სიძულვილის ენაზე, ან ისეთი გამონათქვამების გამოყენებაზე, რომელიც არის პროვოკაციული, ცილისმწამებლური, ღირსების შემლახველი, ქსენოფობიური, შეიცავს მუქარას ან ადამიანს ნებისმიერი ფორმის ძალადობისკენ უბიძგებს. ამასთან, საარჩევნო პროცესის განმავლობაში, პოლიტიკური პარტიების მიერ დაცული უნდა იყოს დადგენილი თამაშის წესები და ეთიკური სტანდარტები, რაც წარმოადგენს საზოგადოების ნდობის მოპოვების მნიშვნელოვან წინაპირობას და კარგი მმართველობის ერთ-ერთ უმთავრესს კომპონენტს.