„ურთიერთობა ჩვენს მოძმე ოსებთან და აფხაზებთან აუცილებლად უნდა აღვადგინოთ”

„ურთიერთობა ჩვენს მოძმე ოსებთან და აფხაზებთან აუცილებლად უნდა აღვადგინოთ” - ალასანიას შეხვედრა გორში

პოლიტიკა - 21:29, 20 Sep, 2016

1375

„ურთიერთობა ჩვენს მოძმე ოსებთან და აფხაზებთან აუცილებლად უნდა აღვადგინოთ”, - განაცხადა ირაკლი ალასანიამ გორის ცენტრში, ,,საბრძოლო დიდების მუზეუმთან“ მოსახლეობასთან გამართულ შეხვედრაზე. გორის მაჟორიტარი დეპუტატობის კანდიდატთან პირისპირ სასაუბროდ სტალინის ბაღში მისული ამომრჩევლების საუბრის ძირითადი საკითხები უკავშირდებოდა ქალაქის და ქვეყნის საგარეო პოლიტიკის პრობლემატიკას. მოსახლეობა კვლავინდებურად უჩივის ადგილობრივი ხელისუფლებისგან უყურადღებობას, ქალაქში გადაუჭრელია ინფრასტრუქტურული და სოციალური პრობლემები.

ირაკლი ალასანიამ შეხვედრის განსაკუთრებული ნაწილი დაუთმო ოკუპაციის პრობლემაზე საუბარს და განაცხადა, რომ ურთიერთობები აუცილებლად უმოკლეს ვადებში უნდა იქნეს აღდგენილი და ქვეყნის გამთლიანება გარდაუვალ პროცესად უნდა იქცეს – „ურთიერთობა ჩვენს მოძმე ოსებთან და აფხაზებთან აუცილებლად უნდა აღვადგინოთ, პროცესები ხელისუფლებისგან უნდა წარიმართოს ისე, რომ ქვეყნის გამთლიანება გარდაუვალ პროცესად იქცეს. ეს რა თქმა უნდა მხოლოდ მშვიდობიანი მოლაპარაკებების გზით განხორციელდება და ამ პროცესებს აუცილებლად დავიწყებთ გორიდან“, – განაცხადა ირაკლი ალასანიამ.