პროკურატურის ქმედება კარსმომდგარ არჩევნებს უკავშირდება

პროკურატურის ქმედება კარსმომდგარ არჩევნებს უკავშირდება - გია ლორთქიფანიძის კომენტარი

პოლიტიკა - 20:17, 20 Sep, 2016

1913

საქართველოს მთავარმა პროკურატურამ 2011 წლის 26 მაისს ნინო ბურჯანაძის მიერ ორგანიზებული აქციის დარბევის საქმეში დღეს ბრალი ოთხ ყოფილ მაღალჩინოსანს წაუყენა. პროკურატურის ინფორმაციით ბრალდებულად არიან ცნობილნი აღნიშნულ საქმეში დავით ახალაია, ლევან ქარდავა, ვასილ ლელუაშვილი და რევაზ შიუკაშვილი.

საგამოძიეობო უწყებამ ასევე დაკიტხვაზე დაიბარა საქართველოს შინაგან საქმეთა მინისტრი ყოფილი მოადგილე, ამჟამად ოდესის მთავარი სამმართველოს უფროსი გია ლორთქიფანიძე. მას დაკითხვაზე გამოცხადების გონივვრულ ვადად 21 სექტემბრის 18:00 საათი დაუდგინდა.

„ნიუპოსტი“ ლორთქიფანიძეს ოდესაში დაუკავშირდა. მისი განცხადებით დაკითხვაზე გამოცხადებას ვერ შეძლებს. რაც შეეხება პროკურატურის განცხადებას, იგი მიიჩნევს, რომ ეს ყოველივე პოლიტიკურად არის მოტივირებული.

როგორც ლორთქიფანიძემ ჩვენთან საუბარში აღნიშნა, იგი 26 მაისის საქმეზე სამჯერ არის დაკითხული და საგამოძიებო უწყებისთვის ამომწურავი ინფორმაცია აქვს მიცემული.

„უწყებაში ნათქვამია, რომ ხვალ 18:00 საათზე უნდა გამოვცხადდე 26 მაისის საქმეზე დაკითხვაზე. აღნიშნულ საკითხზე რამდენიმეჯერ ვარ დაკითხული და გამოძიებისთვის მიცემული მაქვს სრული ინფორმაცია რაც კი გამაჩნდა, დამატებით ამ საქმეზე არაფერი მაქვს სათქმელი და ეს განმარტება გამოძიებისთვისაც მაქვს მიცემული. ჩვენების მიცემიდან სამი წლის განმავლობაში ვცხოვრობდი საქართველოში. ჩემს მიმართ არავითარი კითხვა არ გასჩენია გამოძიებას.

ხვალ სიტყვით გამოვდიდავრთ პარლამენტში, კომიტეტში მოსმენა მაქვს, ფიზიკურად ვერ მოვახერხებ ჩამოსვლას. არც დღეს გავრცელებულ ვიდეომასალასთან და არც ჩემი დაკითხვისას წარმოდგენილ ვიდეოებთან არავითარი პასუხი არ გამაჩნია. უკრაინის ნაციონალურ პოლიციაში ერთ-ერთი დიდი დანაყოფის მოქმედი ხელმძღვანელი ვარ და ვერანაირად ვერ მოვახერხებ ამ მოკლე ვადაში საქართველოში ჩამოსვლას.

ყველასთვის გასაგებია, რომ პროკურატურის ქმედება მოკლებულია ყოველგვარ გონივრულობას და უკავშირდება კარსმომდგარ არჩევნებს და ხელისუფლების მცდელობაა ჩემი საქართველოში დაბრუნების ხელშეშლისათვის. ძალიან ვწუხვარ, რომ პროკურატურის მოქმედება ნაკარნახევია გარკვეული პარტიების ინტერესების მიხედვით“, - აცხადებს ლორთქიფანიძე „ნიუპოსტთან“ საუბრისას.