დღევანდელი ხელისუფლება ახერხებს, რომ რეალურ დანაშაულებს პოლიტიკური ელფერი მისცეს

დღევანდელი ხელისუფლება ახერხებს, რომ რეალურ დანაშაულებს პოლიტიკური ელფერი მისცეს - ამირან გიგუაშვილი

პოლიტიკა - 18:26, 20 Sep, 2016

1179

,,ირაკლი ალასანია - თავისუფალი დემოკრატების” გლდანის მაჟორიტარი დეპუტატობის კანდიდატი, ადვოკატი ამირან გიგუაშვილი პროკურატურის მიერ გამოქვეყნებულ 26 მაისის ამსახველ ვიდეო მასალას განცხადებით ეხმაურება. ადვოკატის აზრით 26 მაისის საქმეზე მთავარი პროკურატურის მიერ კუდის ყოფილი მაღალაჩინოსნებისთვის ბრალის წაყენებამ კიდევ ერთხელ დაადასტურა, რომ ხელისუფლება სამართლიანობის აღდგენის თემას ვიწრო პოლიტიკური სპეკულაციებისთვის იყენებს.

" ოცნების ხელისუფლება აგრძელებს სამართლიანობის აღდგენის იდეის დისკრედიტაციას და რეალური დანაშაულებისათვის პოლიტიკური ელფერის მინიჭებას. პრობლემა მხოლოდ ის კი არ არის, რომ ნაციონალური ხელისუფლების დროს მართლაც არბევდნენ მშვიდობიან მიტინგებს და სასტიკად უსწორდებოდნენ საკუთარ მოსახლეობას, პრობლემაა ის, რომ დღევანდელი ხელისუფლება ამ თემებით სპეკულაციას აგრძელებს და ახერხებს, რეალური დანაშაულებს პოლიტიკური ელფერი მისცეს"

ამირან გიგუაშვილის განცხადებით ოცნების ხელისუფლებას წინასაარჩევნოდ სანახაობის გარდა არაფერი აქვს შესათავაზებელი მოსახლეობისათვის და სწორედ ამიტომ ცდილობს მძიმე წარსულის შეხსენებით მოახერხოს ელექტორატის მობილიზება.

"როდესაც ამომრჩევლისათვის გაკეთებული საქმეები არ გაქვს შესათავაზებელი, ვერ გახსენი საწარმოები, ვერ ააგუგუნე ეკონომიკა, ვერ აღადგინე სამართლიანობა, მაშინ ბუნებრივია იაფფასიანი სანახაობის გარდა შესათავაზებელი აღარც არაფერი გაქვს. საზოგადოებას ეს სპექტაკლი უკვე ბევრჯერ აქვს ნანახი. შევარდნაძე ხალხს გიორგაძით აშინებდა, სააკაშვილი პუტინთან შეკრული ოპოზიციით, ოცნების ხელისუფლება ნაციონალური მოძრაობის დაბრუნებით ცდილობს ხალხის დაშანტაჟებას. მაგრამ არ გამოვა ეს ამბავი. დარწმუნებული ვარ რვა ოქტომბრის არჩევნების შემდეგ ხელისუფლებაში მოვა ჯანსაღი ძალა, რომელიც უღირს წარსულზე ერთხელ და სამუდამოდ იტყვის უარს და ქვეყანაში სამართლიანობის რეალურ განცდას დაამკვიდრებს"-განაცხადა ამირან გიგუაშვილმა.