საქართველოს პრეზიდენტი არჩევნებში მონაწილე პარტიებს "მშვიდობის მემორანდუმის" ხელმოწერისკენ მოუწოდებს. ამასთან დაკავშირებით განცხადება დღეს გამართულ ბრიფინგზე პრეზიდენტის პრესსპიკერმა - ეკა მიშველაძემ გააკეთა:

„ჩვენ ძალიან მნიშვნელოვნად მიგვაჩნია, რომ 2016 წლის საპარლამენტო არჩევნები ჩატარდეს სამართლიან, მშვიდ და დემოკრატიულ გარემოში.

პრეზიდენტი კიდევ ერთხელ მიესალმება პრემიერის ინიციატივას მშვიდობის მემორანდუმთან დაკავშირებით და კიდევ ერთხელ მოუწოდებს პარტიებს მემორანდუმის ხელმოწერისკენ.

მართალია, მემორანდუმები არ არის არჩევნების მშვიდ ვითარებაში ჩატარების სრული გარანტი, გარანტი პირველ რიგში, კანონის უზენაესობა და მისი დაცვაა.

კანონის დაცვას კი, პრეზიდენტის აზრით, არ სჭირდება დამატებითი პოლიტიკური კეთილი ნება. ამისთვის უპირველეს ყოვლისა, შინაგან საქმეთა სამინისტრომ, მოქმედი კანონმდებლობის ფარგლებში, უნდა შეასრულოს თავისი პირდაპირი მოვალეობა და მიუხედავად პირადი პოლიტიკური სიმპათიისა, დაიცვას ყველას უფლება- აწარმოოს მშვიდი საარჩევნო კამპანია.“- განაცხადა ეკა მიშველაძემ.