"შემომწირველებს შემოსავალი არ ჰქონდათ და ვალები უფიქსირდებოდათ... ჯანდიერის განცხადება პიარის მცდელობაა"

"შემომწირველებს შემოსავალი არ ჰქონდათ და ვალები უფიქსირდებოდათ... ჯანდიერის განცხადება პიარის მცდელობაა" - აუდიტის სამსახური

პოლიტიკა - 15:33, 19 Sep, 2016

2232

სახელმწიფო აუდიტის სამსახურის პარტიების ფინანსური საქმიანობის მონიტორინგის სამსახურის უფროსი ზურაბ აზნაურაშვილი ”პაატა ბურჭულაძე-სახელმწიფო ხალხისთვის” ერთ-ერთმა ლიდერის დავით ჯანდიერის ბრალდებებს წინასაარჩევნოდ პიარის გაკეთების სურვილს უკავშირებს.

როგორც აზნაურაშვილმა "ნიუპოსტს" უთხრა, აუდიტის სამსახური საჭიროების შემთხვევაში შემოწირულობებისა და გამოკითხვების სტატისტიკის გასაჯაროებისთვის მზადაა.

"მიუღებელია წინასაარჩევნო პიარზე გათვლილი განცხადებები, ეს პროცესი თვეების განმავლობაში მიმდინარეობდა, "სახელმწიფო სახლისთვის" ლიდერებს კი ეს საკითხი რატომღაც ახლა გაახსენდათ. საჭიროების შემთხვევაში ჩვენ შეგვიძლია გავასაჯაროოთ შემოწირულობებისა და გამოკითხვების სტატისტიკა, წარვადგენთ ყველა მასალას რომელიც გადაგზავნილ იქნა სასამართლოში, რაც დაადასტურებს, რომ დაჯარიმებული პირები იყვნენ არაუფლებამოსილი შემოწირულება განეხორციელებინათ - განაცხადა აზნაურაშვილმა.

მისი თქმით, პარტიის ”სახელმწიფო ხალხისთვის“ თანხები ისეთმა პირებმა შესწირეს, რომლებსაც შემოსავალი არ უფისირდებოდათ, მიკროსაფონასო ორგანიზაციებში კი ვალები ერიცხებოდათ.

"როდესაც შემოსავლების სამსახურში შემომწირველებს არ უდასტურდებათ არანაირი შემოსავალი, ბუნებრივია ასეთ პირებს ინტერვიუზე მოსვლასა და დოკუმენტების წარდგენას ვთხოვთ. როცა ინტერვიუსას პირი ამბობს, რომ ხელფასი არ აქვს, ვალები კი უფიქსირდება, ძნელია დაიჯერო რომ 200 ლარს ვერ იხდის, თუმცა კონკრეტულ პარტიისთვის 5 000 ლარის შეწირვას გეგმავს. ეს ტყუილი და არარეალურია"- აღნიშნა აუდიტის სამსახურის წარმომადგენელმა.

ზურაბ აზნაურაშვილის განცხადებით, მისი უწყება ყველა პარტიის მიერ მიღებულ შემოწირულებას, რასაც ამოწმებს შემოსავლების სამსახურსა და საბანკო მონაცემებთან ერთად და მხოლოდ ამის შემდგომ იღებს ადმინისტრაციული სამართალდარღვევის ოქმის შედგენისა და სასამართლოში გაგზავნის გადაწყვეტილებას.

”სხვადასხვა პარტიის წარმომადგენლების მიმართ11ოქმი შევადგინეთ, საბოლოოდ გადაწყვეტილებას სასამართლო იღებს. ჯამში გამოკითხულია 80 პირი, საიდანაც მხოლოდ 33 არის „სახელმწიფო ხალხისთვის“ შემომწირველი - აღნიშნა ზურაბ აზნაურაშვილმა.