„კლიმატის სამოქმედო გეგმის“ დაგეგმარებისა და იმპლემენტაციის საკითხებზე სამუშაო შეხვედრა გაიმართა

პოლიტიკა - 10:31, 19 Sep, 2016

1056

სასტუმრო „თბილისი მარიოტში“ „კლიმატის სამოქმედო გეგმის“ დაგეგმარებისა და იმპლემენტაციის საკითხების შესახებ სამუშაო შეხვედრა გაიმართა. შეხვედრის მონაწილეებს გარემოსა და ბუნებრივი რესურსების დაცვის მინისტრის მოადგილემ თეიმურაზ მურღულიამ მიმართა.

ღონისძიება გერმანიის ფედერალური სახელმწიფოს მიერ დაფინანსებული პროექტის - „აღმოსავლეთ პარტნიორობის ქვეყნების შესაძლებლობების განვითარება კლიმატის ცვლილების სფეროში ევროკავშირის მიერ დასახულ მაჩვენებლებთან შესაბამისობის უზრუნველყოფის მიზნით“ ფარგლებში გაიმართა.

შეხვედრის მიზანია სამოქმედო გეგმის მომზადების პროცესის ძირითადი ელემენტების იდენტიფიცირება და გერმანიის გამოცდილების გაზიარება.

პროექტი ერთდროულად საქართველოსა და მოლდოვაში მიმდინარეობს და ევროკავშირის დირექტივების იმპლემენტაციასა და კლიმატის ცვლილების საკითხის საერთო საჭიროებებისათვის საკონსულტაციო მომსხურებას უზრუნველყოფს, რაც საშუალებას იძლევა ასოცირების ხელშეკრულების დირექტივების განხორციელების პროცესის დაგეგმარებას.

შეხვედრას გარემოსა და ბუნებრივი რესურსების დაცვის სამინისტროს, გერმანიის საერთაშორისო თანამშრომლობის საზოგადოების (GIZ), გერმანიის ელჩი საქართველოში, რეგიონული განვითარებისა და ინფრასტრუქტურის, სოფლის მეურნეობის, ეკონომიკისა და მდგრადი განვითარების სამინისტროს, საქართველოს მწვანეთა მოძრაობა/დედამიწის მეგობრები-საქართველოს, კავკასიის გარემოსდაცვითი არასამთავრობო ორგანიზაციების ქსელის (CENN), გაეროს განვითარების პროგრამა საქართველოში (UNDP) და აშშ-ს საერთაშორისო განვითარების სააგენტოს (USAID) წარმომადგენლები ესწრებოდნენ.