რესპუბლიკური პარტია ,,პატრიოტთა ალიანსს“ ხიდაშელის პლაკატების მიზანმიმართულ დაზიანებაში სდებს ბრალს

პოლიტიკა - 20:02, 18 Sep, 2016

2077

საბურთალოს #4 საარჩევნო ოლქის მაჟორიტარი კანდიდატის თამარ ხიდაშელი განცხადებას ავრცელებს, სადაც ნათქვამია, რომ დიდ დიღომში ადგილი ჰქონდა მისი საარჩევნო პლაკატების მიზანმიმართულ დაზიანებას. თამარ ხიდაშელი „თავისუფალი და სამართლიანი არჩევნებისათვის უწყებათაშორის კომისიას” და თბილისის მერიის შესაბამის სამსახურს რეაგირებისკენ მოუწოდებს.

,,18 სექტემბერს დიდ დიღომში, პეტრე იბერისა და მირიან მეფის ქუჩაზე, თამარ ხიდაშელის საარჩევნო პლაკატები მიზანმიმართულად დააზიანეს და დაფარეს საარჩევნო სუბიექტის „დავით თარხან-მოურავი, ირმა ინაშვილი - საქართველოს პატრიოტთა ალიანსი, გაერთიანებული ოპოზიცია” ერთ-ერთი მაჟორიტარი კანდიდატის საარჩევნო პლაკატებით.

აღნიშნული ქმედება ისჯება საქართველოს საარჩევნო კოდექსის 46-ე მუხლის , მე-71 ნაწილით, კერძოდ: „დაუშვებელია და ამ კანონით დადგენილი წესით ისჯება სააგიტაციო მასალის ჩამოხსნა, ჩამოხევა, დაფარვა ან დაზიანება, თუ ის აკრძალულ ადგილას არ არის განთავსებული“

ამავე კანონის მე-80 მუხლის პირველი ნაწილის მიხედვით, წინასაარჩევნო მოწოდებებისა და მასალების გავრცელებისთვის ხელის შეშლა ითვალისწინებს ფულად ჯარიმას 1000 ლარის ოდენობით.

მივმართავ „თავისუფალი და სამართლიანი არჩევნებისათვის უწყებათაშორის კომისიას” და თბილისის მერიის შესაბამის სამსახურს რეაგირებისთვის“ - ნათქვამია თამარ ხიდაშელის განცხადებაში.