"სამი წელია პასუხი არ გამიცია და დღეს რატო გაგცემთ?"- მარგველაშვილი ივანიშვილის განცხადებაზე

პოლიტიკა - 20:36, 17 Sep, 2016

8728

საქართველოს პრეზიდენტმა დიანა ტრაპაიძის გადაცემაში „შეკითხვის დრო“ კომენტარი ბიძინა ივანიშვილის მიერ მისი მისამართით გაკეთებულ განცხადებას გამოეხმაურა, იმასთან დაკავშირებით, რომ გიორგი მარგველაშვილი მისი ყველაზე დიდი შეცდომა და იმედგაცრუებაა. გიორგი მარგველაშვილის თქმით ის არ აპირებს ამ განცხადებას იგივენაირად უპასუხოს, რადგან მიაჩნია, რომ ეს საზოგადოებისთვის და პოლიტიკური პროცესებისთვის მომგებიანი არაა. პრეზიდენტის განცხადებით, თუ ვინმე მასზე პიროვნულადაა ნაწყენი, ამის გასარჩევად პირადი დიალოგი არსებობს და არა სატელევიზიო ეთერი:

„ძალიან კარგი მცდელობაა, რომ ამალაპარაკოთ მაგრამ მე ამ თემებს ღია ეთერში არ განვიხილავ, იმიტომ რომ ეს არ არის პროდუქტიული საზოგადოებისთვის. მე უნდა ვსაუბრობდე პოლიტიკურ პროცესებზე, ღირებულებებზე და არა იმ ჭორაობაზე, რომლისკენაც მუდმივად ქართულ პოლიტიკას ტენდენცია აქვს. ეს თემები განიხილონ იმ ადამიანებს, რომლებსაც ამის განხილვა უნდათ. მე არ ვაპირებ ჩემს პირად გრძნობებზე საუბარს. ამ ადამიანებს, რომლებსაც ჩემთან პიროვნული გასარჩევი აქვთ, ნაწყენია თუ გულაცრუებულია, ამისთვის არსებობს პირადი დიალოგი, არ არის საჭირო ერთმანეთს ტელევიზიით ვესაუბრობთ. სამი წელია ამ ვითარებაში ვარ, რომ მუდმივად მიმდინარეობს ჩემზე რაღაცის მოყოლა და დისკრედიტაცია. სამი წელია პასუხი არ გამიცია და დღეს რატო გაგცემთ? არ მიმაჩნია ეს სწორად“- განაცხადა გიორგი მარგველაშვილმა.