საქართველოს პრეზიდენტის განცხადებით არაფორმალურ მმართველობაზე საუბარი მაშინ შეეძლება, როდესაც კონკრეტული მაგალითი ექნება. როგორც გიორგი მარგველაშვილმა განაცხადა ბიძინა ივანიშვილი მას მხოლოდ მაშინ მართავდა, როდესაც ეს სტატუსით ეკუთვნოდა, ივანიშვილი პრემიერი იყო , მარგველაშვილი კი მინისტრი.

„ჩემი მართვა არ ხორციელდებოდა არცერთ ეტაპზე გარდა იმისა, როდესაც მე ვიყავი მინისტრი და ის იყო პრემიერ-მინისტრი, ამის გარდა მე ვერ დაგიდასტურებთ”- განაცხადა მარგველაშვილმა.

საქართველოს პრეზიდენტმა კომენტარი იმ ერთსულოვან კრიტიკაზეც გააკეთა , რომელიც პერიოდულად მისი მისამართით ბიძინა ივანიშვილის განცხადებების კვალდაკვალ მმართველი გუნდისგან ისმის. მარგველაშვილის თქმით ეს არ არის მართვა, ეს არის მათი ლეგიტიმური, დემოკრატიული უფლება, რომ აკრიტიკონ საჯარო პირი. პრეზიდენტის თქმით, მას არ მიაჩნია პროდუქტიულად მსგავს განცხადებებზე პასუხის გაცემა და იმ დიალოგების შინაარსის გარეთ გამოტანა, რომელიც პოლიტიკოსების პირად შეხვედრების დროს ხდებოდა:

„როდესაც სამი წლის განმავლობაში მთელი პოლიტიკური სპექტრი განგიხილავს, შენ ნათქვამს განიხილავს, წარმოგიდგენიათ, რომ მე არ მქონოდა საპასუხო და მოსაყოლი? არაფრის დიდებით ეს ნაბიჯი არ გადავდგი, არა იმიტომ, რომ საინტერესო არ იქნებოდა, საინტერესო ლაივ- შოუებიცაა, ეგრე ხალხი „დომ 2“-საც უყურებს და „დომდვაიზაცია“ ქართული პოლიტიკის იქნება არასწორი. პოლიტიკოსებმა ერთმანეთს სამუშაო სივრცე უნდა დავუტოვოთ. საჯარო განცხადება სხვა არის და სხვაა შენ რასაც იტყვი , რომ ეს აქ რჩება. თუ ამ პოლიტიკოსებზე, რომლებიც ჩემზე ყვებოდნენ ხომ შეიძლება ვივარაუდოთ, რომ მე მათზე ბევრად მეტი მაქვს მოსაყოლი.“- განაცხადა გიორგი მარგველაშვილმა.