„ბიძინას გამოსვლებმა უფრო გააღიზიანა ხალხი, ამიტომ „ოცნებას“ გაუჭირდება გასვლა“-გამოკითხვა გურიაში

პოლიტიკა - 17:43, 17 Sep, 2016

11447

„ბიძინას გამოსვლებმა უფრო გააღიზიანა ხალხი, ამიტომ „ოცნებას“ გაუჭირდება გასვლა“ ჩოხატაურელები საპარლამენტო არჩევნებამდე - „ისეთ განწყობაზე ვართ ვფიქრობ არ წავალ არჩევნებზე, დავიღალეთ უკვე“ რა შედეგით დასრულდება არჩევნები, ვინ მოიგებს მას და ვინ მოირგებს მთავარი ოპოზიციონერის მანტიას, ვინ დარჩება პარლამენტს მიღმა და ვის მოუწევს ოთხწლიანი მეცადინეობა. ჩოხატაურში საარჩევნო მარათონი დაწყებულია, თუმცა გამოკვეთილი ლიდერი არ ჩანს. მთავარი პოლიტიკური ბატალიებისთვის ემზადება ამომრჩეველი, მაგრამ დღეს ძნელია ისაუბრო, როგორი იქნება მოქალაქეთა აქტივობა. ჩვენი გამოკითხვიდა ჩანს, რომ საზოგადოება იმედგაცრუებულია და ახლა პოლიტიკური პროცესებისადმი პესიმისტურად არის განწყობილი. თავად პოლიტიკური პარტიის წარმომადგენლები, რომლებიც საპარლამენტო არჩევნებში ღებულობენ მონაწილეობას, ფიქრობენ რომ მოსახლეობაში მაღალი რეიტინგი აქვთ და მას ადგილობრივები მხარს დაუჭერენ. რამდენად აქვთ მოქალაქეებს სამართლიანი არჩევნების მოლოდინი? – „გურიის მოამბე“ დაინტერესდა, როგორია საზოგადოების დამოკიდებულება და აპირებენ თუ არა ისინი, საპარლამენტო არჩევნებში მონაწილეობას და თუ აპირებენ, ვის ეკუთვნის მათი საარჩევნო ხმა. გამოკითხულთა უმეტესობას მიაჩნია, რომ 2016 წლის საპარლამენტო არჩევნები არასამართლიანად ჩატარდება. გამოკითხულთა ნაწილს მიაჩნია, რომ დღევანდელი ხელისუფლება ეცდება, რომ არჩევნების შედეგები გააყალბოს. თამაზი, 62 წლის: „ვის მივცემ ხმას და ვინც დაიმსახურებს ხალხის ნდობას. ერთხელ მოვყტუვდით , ამასაბაში დავბერდი ბიძია, ვუყურებთ ამათ, ერთი წავა, მეორე მოვა და ასე“. დათო, 34 წლის: „არავის არ ვაძლევ ხმას, რა გააკეთეს როცა ავირჩიეთ?“ გიორგი, 27 წლის: „უკვე გადაწყვეტილი მაქვს, ვის ვაძლევ ხმას. სასურველი კანდიდატის საარჩევნო პროგრამასაც გავეცანი,რა თქმა უნდა, პროგრამის მიხედვით ვაძლევ ხმას.“ ლალი, 38 წლის: „თუ ოცნება“ კიდევ გავა ეს ნიშნავს რომ გააყალბეს. საზოგადოებას ჰქონდა სხვა მოლოდინი და იმედი. მაგრამ ფაქტია, რომ მმართველმა კოალიციამ საქართველოს მოსახლეობის დიდი ნაწილი ნამდვილად გააწბილა. როდესაც ადამიანს პირდები იმას, რომ ოღონდ ნაციონალები წავიდეს და უკეთეს პირობებში გაცხოვრებთო, უარესში არ უნდა აღმოვჩნდეთ.“ თამარი, 38 წლის: „ყველა კანდიდატს არ ვიცნობ, ჭკუასელი რომ მოხსნეს ეს ვიცი. რამდენიმე მაქვს გაგონილი. რამდენი პლაკატზე ვნახე, არ ვიცი ვის მივცემ ხმას“. თამრიკო, 45 წლის: „ისეთ განწყობაზე ვარ, ვფიქრობ არ წავალ არჩევნებზე. დავიღალეთ უკვე. ძალიან მძიმეა ეკონომიკური და სოციალური ფონი. გაძვირებული ცხოვრება და დამძიმებული საბანკო ვალდებულებები ცუდად აისახება საარჩევნო განწყობებზე“. ნინო, 42 წლის: „ჯერ ვფიქრობ, ვის მივცე ხმა. საარჩევნო პროგრამას არ გავცნობივარ. ტელევიზორში რასაც ვუყურებ, კანდიდატების მიმართ ცუდი განწყობა არ მაქვს, თუმცა მაინც „ქართული ოცნების“ საპარლამენტო კანდიდატზე ვაკეთებ არჩევანს.“ გულო, 55 წლის: „ბიძინას გამოსვლებმა კიდევ უფრო გააღიზიანა ხალხი, ამიტომ „ოცნებას“ გაუჭირდება გასვლა. ბურჭულაძეს ჰქონდა რეიტინგი და ახლა არ ვიცი რა მოხდება. ხალხი იძახის არ მივდივართ არჩევნებზეო“.