ნიკა გვარამიამ შსს დატოვა - ,,8 ოქტომბერს გირჩევთ, ავირჩიოთ ნებისმიერი სხვა“

პოლიტიკა - 21:26, 16 Sep, 2016

14242

ტელეკომპანია რუსთავი 2-ის გენერალური დირექტორის დაკითხვა შინაგან საქმეთა სამინისტროში დასრულდა, ნიკა გვარამია საგამოძიებო ორგანოში მისი და პაატა ბურჭულაძის ფარული სატელეფონო ჩანაწერის გავრცელების საკითხზე მიმდინარე გამოძიების ფარგლებში იყო დაბარებული.

გვარამიამ დაკითხვიდან გამოსვლის შემდეგ „კურიერის“ პირდაპირ ეთერში განაცხადა, რომ მას არ აქვს იმედი, რომ ეს გამოძიება ბოლომდე იქნება მიყვანილი, 8 ოქტომბერი კი არის რეფერენდუმი, რომელიც გადაწყვეტს „დარჩება თუ არა დამნაშავე ხელისუფლება“ ქვეყნის მმართველობაში:

„ახალი არაფერი არ ყოფილა შეკითხვები იყო ძირითადად ტექნიკური ხასიათის. რაზეც მე პასუხები გავეცი, გამომძიებელი იყო კვალიფიციური და კორექტული, თუმცა, მე დარწმუნებული ვარ, რომ საქმე არ იქნება ბოლომდე გამოძიებული, რადგან ასეთი ტიპის გამოძიება არ არის დამოკიდებული რიგით გამომძიებლებზე და რიგით პროკურორებზე. ხელისუფლების ცვლილების შემდეგ რა თქმა უნდა ეს გამომძიებელიც და სხვა რიგითი პროკურორებიც დაკითხავენ არა მხოლოდ დაზარალებულებს და მოწმეებს, არამედ საკუთარ ზემდგომებს, რომლებიც გეგმავენ ამ დანაშაულებს. არ არის ცნობილი დაიკითხა თუ არა კიდევ სხვა ვინმე ჩემი და პაატა ბურჭულაძის გარდა. დასვან მარტივი კითხვა საიდან გაიგო რეპორტიორი.ჯი-მ „იუთუბზე“ ამ ჩანაწერის არსებობის თაობაზე? დაკითხონ ეს ადამიანები და შეიძლება მოკლედ მივიდეთ პასუხამდე. ჩემთან დაკავშირებით დაგროვდა თითქმის ათამდე შემთხვევა, როდესაც მე სხვადასხვა სტატუსით ვიყავი საგამოძიებო უწყებაში, მაგრამ არცერთი გამოძიება არ მისულა ბოლომდე, დამნაშავე ყველა შემთხვევაში არის სახელმწიფო, 2016 წლის 8 ოქტომბერი არის რეფერენდუმი, დავტოვოთ სახელმწიფოს დამნაშავე ხელისუფლება თუ ავიცილოთ ეს ყველაფერი თავიდან და ავირჩიოთ ნებისმიერი სხვა?! მე გირჩევდით, რომ ავირჩიოთ ნებისმიერი სხვა“, - განაცხადა ნიკა გვარამიამ.