დღეს შინაგან საქმეთა სამინისტროში დაკითხვაზე პაატა ბურჭულაძე და ნიკა გვარამია მივიდნენ. საქმე ეხება გვარამია-ბურჭულაძის რამდენიმე დღის წინ გამოქვეყნებულ ფარულ სატელეფონო საუბარზე მიმდინარე გამოძიებას.

ბურჭულაძემ საგამოძიებო ორგანო რამდენიმე წუთის წინ დატოვა, გვარამიას დაკითხვა კი ამ დრომდე გრძელდება. დაკითხვიდან გამოსულმა ბურჭულაძემ ჟურნალისტებისთვის კომენტარი გააკეთა და განაცხადა, რომ დღეს სუსი კგბს მეთოდებით მოქმედებს:

”მე ვაგრძელებ ბრძოლას და ხვალ გავდივარ რეგიონებში, მაგრამ ორშაბათს უნდა შევწყვიტო ეს ბრძოლა, რადგან ორშაბათს მე აუცილებლად დავნიშნავ პრესკონფერენციას 11 საათზე, სადაც მოვიწვევ დიპლომატიურ კორპუსს, არასამთავრობოებს, მედიას, საერთაშორისო დამკვირვებლებს და გავაკეთებ მწვავე განცხადებას. ასე გაგრძელება არ შეიძლება. ეს არის ძალიან ცუდი მეთოდები, ორშაბათს მე ვისაუბრებ იმაზე, თუ როგორ მიმდიმარეობს ჩვენთან საარჩევნო "დემოკრატიული" პროცესი და როგორი ზეწოლაა ჩვენზე“,- განაცხადა პაატა ბურჭულაძემ.