4 ტელევიზიის საერთო ეგზიტპოლს შესაძლოა საზოგადოებრივი მაუწყებელი გამოეყოს

პოლიტიკა - 14:04, 16 Sep, 2016

1212

კვლევითმა კომპანიებმა - თი-ენ-ესმა და "გორბიმ" 8 ოქტომბერს დაგეგმილ ეგზიტპოლთან დაკავშირებით, პრეზენტაცია გამართეს. 4 მაუწყებლის მიერ დაკვეთილი ეგზიტპოლის შედეგები როგორც პროპორციულ, ასევე მაჟორიტარულ ოლქებთან დაკავშირებით, 8 ოქტომბერს 8 საათზე არჩევნების დასრულებისთანავე გამოქვეყნდება. საველე სამუშაოებს საზოგადოებრივი აზრისა და მარკეტინგული კვლევის ცენტრი "გორბი" ჩაატარებს.

აღნიშნული კომპანიები ეგზიტპოლს 4 მაუწყებლის (საზოგადოებრივი მაუწყებლის, იმედის, DGS-ის და მაესტროს) დაკვეთით ატარებენ, თუმცა დღევანდელ პრეზენტაციას საზოგადოებრივი მაუწყებლის წარმომადგენელი არ დასწრებია. გავრცელებული ინფორმაციით, პირველი არხი შესაძლოა გამოეყოს იმედის, DGS-ის და მაესტროს ოთხეულს.

საზოგადოებრივ მაუწყებელს გადაწყვეტილების გადახედვისკენ არასამთავრობო ორგანიზაციებიც მოუწოდებდნენ. სამ კერძო ტელეკომპანიასთან, იმედთან, მაესტროსთან და GDS-სთან ერთად არჩევნების დღეს ეგზიტპოლის ჩატარება სამოქალაქო სექტორის თქმით, მაუწყებლის სანდოობასა და მიუკერძოებლობას ეჭვქვეშ დააყენებს და არხს პოლიტიკურ იარაღად აქცევს. მედიის მკვლევარები ვარაუდობენ, რომ 4 არხის გაერთიანება რუსთავი 2-ის მიერ დაგეგმილი ეგზიტპოლის საპასუხოა და მმართველი პარტიის ინტერესს ემსახურება.