საქართველოში ევროპის საბჭოს საპარლამენტო ასამბლეის წინასაარჩევნო მისიის წევრებმა საპარლამენტო პარტიებთან შეხვედრები დაიწყეს. ამ წუთებში პარლამენტში პირველი შეხვედრა მიმდინარეობს. ფრაქცია „ქართული ოცნება - დემოკრატიული საქართველოს“ ლიდერმა გია ვოლსკიმ შეხვედრის დაწყებამდე ჟურნალისტებისთვის კომენტარი გააკეთა. მისი განცხადებით შეხვედრაზე საუბრის მთავარი თემა იქნება არჩევნები:

"იქნება ალბათ ამ დესტაბილიზაციის საფრთხეზეც საუბარი. ამ საკითხთან დაკავშირებით ჩემი შეხედულება მაქვს და ამაზე არაერთხელ მისაუბრია. ვფიქრობ, "ნაციონალური მოძრაობის" უცვლელი ლიდერი საკმაოდ ღია, სკანდალურ განცხადებებს აკეთებს იმასთან დაკავშირებით, რომ რეჟიმი უნდა დაემხოს. არჩევნებს ვერ დაველოდებით, ეს იყო როგორც ფორბსისთვის მიცემულ ინტერვიუში, ისე "რუსთავი 2"-ისთვის მიცემულ ინტერვიუებში. სააკაშვილს ვგულისხმობ. არის კიდევ ბევრი სხვა, რომელიც პოლიტიკოსებისთვის და საზოგადოებისთვის ღია ინფორმაციაა, რა დამატებით ინფორმაციას ფლობს შსს, ამასთან დაკავშირებით, დამატებითი კომენტარი არ მაქვს." - განაცხადა გია ვოლსკიმ შეხვედრის დაწყებამდე.